炸蕃薯

依輪啲蕃薯又大靚兼好平，二蚊螃咋。。。

買佐四個巨型大蕃薯，都係六蚊雞~~~

依日切片，愛嚟炸蕃薯食，細個時屋企阿媽一到冬天就會經常炸下蕃薯炸下大蕉，所以自細都係食煎炸嘢長大，根本未發生過「上火」依類問題~~~

同老公話要炸蕃薯食，老公開心到係電話度話「我晏畫返嚟食面，順便炸幾塊嚟食下啊」

買嘅係依種蛋黃大蕃薯，好鬼甜㗎~~~

切薄片~~

炸粉我用嘅係天婦羅炸粉，用一隻蛋黃，少少水開佐佢。

 

同埋幾條芝士腸~~

咁就搞掂個架步啦~~

 

個粉開得大概就咁嘅結度，唔好太稀，要可以俾個蕃薯「掛到糊」

 

炸至金黃~~

炸嘢通常我會先猛火炸佢一分鐘然後細細火炸多一分鐘，撈起攤一攤凍，再落油大火返炸十幾秒，咁塊炸蕃薯就脆卜卜，金燦燦，香香口啦~~

 

好香口嘅炸蕃薯，係咪好靚咧~~

 

我一邊係度炸，有個哥哥一邊係度幫我消滅佢，都就嚟趕唔及影相添~~~

熱辣辣脆卜卜咁食起上嚟，又真係好過癮~~~

 

古時候中國有好多賣藝搵食嘅人，講明係搵食，當然唔會係條命去博，所以好多表面睇落好驚險嘅场面實情內里另有乾坤，好似比較出名嘅一個「落油鑊」嘅把戲，表演者會從一鍋完全沸騰嘅油鑊里邊撈起某樣物品而雙手毫發無損，睇到人驚心動魄。

其實講穿佐個技巧，個油鑊里邊只不過係面上有一層薄油，底下煮緊嘅全部係醋嚟嘅，咁醋同油一煲滾，睇落表面係好滾好熱嘅樣，其實個溫度係好低，人嘅皮膚係完全唔會受到傷害，係「障眼法」嘅一種。

所以醋嘅其中一個作用，係可以降低同平衡液體嘅溫度。

咁利用依個小原理，愛嚟烚蛋，就最好不過。

 

有時早餐懶得整嘢，會求其烚隻蛋俾老公做早餐。

煲入邊嘅水，倒入一湯匙嘅醋，凍水落蛋，水滾之後煲多半分鐘，然後熄火由得蛋係水入邊焗多幾分鐘。

個蛋係完全唔會爆開，同埋蛋黃係好嫩好滑，剛剛好熟，一啲都唔會老，衝多杯㗎啡同麥皮，一個早餐就咁簡單而快速`~~

落佐醋，煲水永遠唔會滾得太勁，所以蛋就唔會因為過速嘅熱脹冷縮而導致蛋殼爆裂~~~~

一個細細嘅心得，希望可以幫到大家烚蛋啦~~~