周日返去奶奶度做節,整一味餸返去,咁奶奶可以少整個餸,我都叫幫下手咁囉.
通常會整一個返到去再加返熱就食得嘅餸
依次整佐一味唔知係邊度嘅傳統菜式,係酒樓食過叫「粉蒸肉」
我睇到粵菜嘅舊款菜譜入邊其實都有提過依味餸,大家嘅做法係一樣嘅,只不過叫法唔同,但係唔知係咪製作太多功夫過於繁瑣,以至慢慢退出粵菜嘅市場?
如果真係因為咁就真係好可惜,因為依個實在係一個好好味嘅餸菜嚟嘅.
不過好彩,嚟到今日,整依味餸為適應市場嘅需要,可以好方便咁買到製作最繁複嘅其中一個原材料,所以製作起上嚟,減輕好多功夫,亦都變得好簡單,做法同材料都會慢慢同大家介紹.
買佐兩舊五花腩,其實用佐舊半,因為我個籠仔太細.
做法:
腩肉切片,唔好切得太厚,太厚食落會覺得流,但亦都唔好太薄,太薄會食落無晒感覺,我就切得比整扣肉嘅再薄三分一咁嘅厚度.
切好嘅腩肉,用「糖,生抽老抽,腐乳,薑絲,少少生粉」醃一個鐘左右入味.
我係提早一日買定腩肉,擺係雪櫃雪一雪佢,硬身啲好切好多.
睇下除佐腩肉其它的主角.
乾荷葉半塊（雜貨舖有售），蕃薯一個（用薯仔都可以㗎）蒸籠一個，蒸肉米粉一包。
蒸肉米粉可以係九龍塘賣台灣嘢嘅舖頭買到，我依包係國內四川出嘅五香味嘅，我覺得味道香啲。
舊時整依味餸最麻煩係依個米粉，係用普通我哋食用嘅米，白鑊同八角花椒等香料一起炒熟，然後再磨成粉粒，諗到要整咁多功夫，未整先驚。依家可以好方便咁買到半成品，現代人真係幸福~~~
荷葉我先用熱水拖一拖佢，等佢變腍身，然後舖係籠仔底下。
然後將蕃薯切厚條，舖係底。
我貪依個季節蕃薯夠甜，所以就用蕃薯，我以前整用薯仔都好好味㗎，或者芋頭都好正㗎~~
整好個籠仔，然後攪個粉粉啦。
米粉一定要濕透，我就用水開佐個粉，然後撈少少麻油同糯米粉，落麻油係想佢香啲，落糯米粉係希望食落個口感再好啲。
因為米粉本身已有鹽同其它調味，所以我無再俾味佢啦。
跟住將開好嘅米粉，倒入醃好味嘅五花腩度，均勻地令到每塊腩肉都沾上米粉。
我就用佐整扣肉嘅方法，先將腩肉用個碗仔，豬皮向下，一塊塊舖好啲腩肉。
然后倒扣入籠仔度，咁個形狀咪就整齊啲靚啲囉~~
最後，入快速煲，隔水蒸一個鐘左右~~
若用普通鑊蒸，最好蒸熟一個半鐘以上，等個腩肉嘅肥油全部出曬嚟，咁食落，就肥而不膩`~~
所以用籠仔嚟做容器嘅目的，一方面係等佢梳氣好啲，咁蒸好嘅肉就會更容易酥軟，另一方面，籠仔內籠係竹制，加埋底嘅荷葉，咁蒸出嚟嘅腩肉，會帶有一層淡淡嘅竹同荷葉清香，極大嘅減低腩肉嘅肥膩感覺，加埋米粉包住嘅外層，食落係香口軟糯，配以內層蒸到入口即化嘅腩肉，食落絕對一流~~
雖其貌不揚，但若以貌取「餸」，必失之子羽~~
認真可惜~~
若非為照顧大家嘅口味，我同強哥食的話，我會選用麻辣味嘅米粉，配嘅腩肉會加上剁碎嘅辣豆瓣醬，或者用排骨代替腩肉，食落口感極之惹味開胃，比依次整嘅五香味，刺激百倍以上~~~
沒有留言:
張貼留言