自家制---鹵肉飯

擺係雪櫃有兩舊腩肉，已經烚熟佐，好多原因之下，一時來唔及食佢，就掉入雪櫃雪住佢，點知一雪，就雪佐成個星期，係完全唔記得依件事，尋日一睇個雪櫃，先驚覺佢啲嘅存在。

即刻俾電話阿娘「我有兩舊大大舊腩肉，烚熟佐，唔記得食啊，依家雪到硬一硬，擺佐成個禮拜，總食唔食得啊」

阿媽話食得喎，不過雪得咁多日，舊腩肉食起上嚟肯定無咁鮮甜㗎啦。

唔駛嘥都好啲~~~

因為新買佐隻乾嘅梅菜，老闆話愛嚟燜腩肉最正，本嚟係打算買依兩舊腩肉燜梅菜嘅，點知一時無食到，就掉佐係雪櫃，跟住忘記佐佢啲添~~~咁唯有下次再買過腩肉去燜梅菜啦，依次嘅腩肉，就愛嚟整比較濃味嘅台式鹵肉。

做法可參考我以前寫過嘅「鹵肉飯的製作」

 

只不過以前用香菇配搭，咁巧屋企香菇食曬，好彩總有一包昆佈，昆佈其食即係海帶，只不過切到靚一靚，同埋厚身過香港買到果啲，同埋叫法唔同，其實就係海帶嚟嘅~~

台灣鹵味當中，有一味就叫「鹵海帶」，咁我就將昆佈發好之後，最後就嚟煮好之前，先將發好嘅昆佈掉入去一起鹵一鹵~~~

咦，原來成煲鹵肉，真係香好多㗎~~~

而海帶，吸收佐鹵水嘅味道，真係一流啊~~~

估唔到，兩舊嘅腩肉，切好之後，一大煲~~~

足夠我啲食兩三日啦~~~

腩肉真係肥。。。。

睇下，我片起幾多豬油出嚟~~~

做為一個精明嘅師奶，我係唔會嘥料嘅~~

依個五香味嘅豬油，留起佢，愛嚟炒白菜炒乜菜，都絕對一流`~~

 

然後烚佐幾個溏水蛋，擺係煲底，將五花腩轉入瓦煲仔，浸住佢~~~

一人一大碟飯~~~

熱辣辣咁食落，真係好幸福啊~~~~

 

睇下個蛋，真係溏心㗎~~~

外層又鹵得好有味，入邊又香嫩，依個鹵水溏心蛋，正~~~