尋日做冬，循例都食返碗湯圓應下節。
其實係見天凍凍，想食就煮，同做節無乜好大關係。
我諗舊時嘅人係咪因為天凍，飲碗暖笠笠嘅薑汁糖水，除可驅寒更可健體咁解咧？因為薑真係好好嘅驅寒食物，除此之外，譬如做冬食多佐肥膩嘢，有少少胃部不適，做悶反胃嘅時候，薑汁都可以舒緩到以上情況，阿媽教我，如果覺得好似胃酸過多咁嘅情況，切一片老薑，含係個嘴度，等熱辣辣薑汁入到個胃，好快胃酸就可以得到抑制，又或者好似大肚婆，做嘔反胃，好多藥又唔可以食，咁就最好係含一片薑，就最無傷害，又最快見效。
我本身係好鐘意薑嘅果種味道，所以煮湯圓，定必要用薑水做底。
老公話想食得辣啲，咁個就切佐一大舊薑。
我凈係煲一細煲仔水，咁樣一大舊薑，好足夠。
想要薑出味，就咁切片係唔夠㗎，一定要拍一拍個薑，薑拍裂之後，個薑味先至更容易融解於水中，薑味先至最出。
之前整粉蒸肉凈有少少蕃薯嘅邊邊角角位，我無掉，留住係雪櫃。
尋晚整薑水，順便掉落去一起煮埋，咁就變成一款蕃薯糖水。
上次得網友提示，知道薑一定要凍水煲滾，咁食起上嚟先至唔會躁熱，所以就擺定蕃薯同薑，凍水慢慢煲滾。
蕃薯一起落埋煮，咁啖糖水會甜同埋香好多㗎。
我係水滾之後先至落片糖，唔落黑糖，咁啖糖水感覺清潤香濃好多。
就咁飲已經覺得好好味，蕃薯嘅味道全部出佐嚟~~~
當然少不得主角，湯圓
我通常會另外煮，咁個薑糖水就唔會太濁。
滾圓一定要水滾後先至擺入去。
水滾之後滲凍水，等佢熱脹冷縮，咁就唔會個外層熟佐，個心都未熟，咁樣一熱一凍，可以俾到個心都好快熟透，就唔會一直係咁滾到爆曬口，基本上摻過兩次凍水再煲返滾，個湯圓就煮熟佐，好快好易㗎。
點樣謂之熟佐？睇湯圓熄火後都識得自己浮起，就可以判斷佢熟佐。
煮得幾好，無穿無爛。
通常水滾後摻凍水嘅方法，適用於所有依類水煮類食物，好似煮餃子雲吞，甚至西米，都係一樣道理 。
一碗暖笠笠，香噴噴嘅蕃薯拼湯圓糖水，搞掂~~~
我至愛係花生味~~
沒有留言:
張貼留言