今日早餐係~~
正正香煎臘味蘿蔔糕~~~~
新鮮出爐~~~
尋日整，雪一晚，今日早上切嚟剛剛好。
唔一定係要過年先至可以整蘿蔔糕嘅，其實蘿蔔糕唔係難整，又好味，蘿蔔又正氣，幾時食都咁恰當~~~
冬天嘅蘿蔔最多汁又甜，依家嘅蘿蔔真係好多，不過天氣未夠凍，蘿蔔未算最靚，但係肚入邊嘅蘿蔔蟲係度叫下叫下，都買佐支大蘿蔔返嚟，整返個蘿蔔糕慰勞下個不停思念的胃口。
自己整糕，材料隨意，最緊要夠豐富。
我就用佐「薑水（薑刨蓉之後落少少水浸出味道，去渣留水就係薑水啦）、干蔥頭切粒粒、瑤柱浸腍扯成絲、蝦干浸腍切粒粒、冬菇切粒粒、臘腸切粒粒」
蘿蔔一條大大條足有二斤重，去皮之後大約有800克。
我一半切成條狀，另一半刨絲。
咁食起上嚟會有蘿蔔口感多啲。
做法：
1，炒香配料。
炒法：先用油爆到蔥頭粒轉金黃色，撈起，然後原鑊落臘腸炒出油，跟住倒入香菇，等香菇縮佐臘腸嘅甘香，咁個香菇會美味好多㗎，跟住倒入蝦干粒同瑤柱絲，炒出香味，我落佐少少蠔油去調下味。
然後將配料兜起，同爆香嘅干蔥撈勻。
2，原鑊倒入蘿蔔絲，將浸瑤柱嘅水同薑水（去渣）倒入去，煮五分鐘左右，煮到蘿蔔變透明熟透（因為我蘿蔔少，煮五分鐘就足夠，如果蘿蔔多，就要煮耐多少少）
3，煮好嘅蘿蔔，落少少鹽，一細匙糖去調味，落大量胡椒粉~~
（鹽唔好落太多，因為臘腸都有咸味，落少少糖會香甜好多）
然後大家都認為最緊要嘅「粘米粉」要出場啦。
我用粘米粉同澄粉去整依款糕，800克嘅蘿蔔，我就用大約100克嘅粘米粉，10克嘅澄粉去整糕。
比例，無㗎，自己估下估下咁羅，因為舊年整蘿蔔糕，三斤半嘅蘿蔔，我就用佐270克嘅粘米粉同30克嘅澄粉，我覺得硬佐少少，所以依次整，就相應減少粉嘅用量。
其實整糕，無話點樣嘅材料份量最正確，最緊要係適合自己嘅喜好，人啲話俾你知用佐咩材料同大概嘅份量，就已經足夠，至於份量嘅把握，最緊要係靠個人去控制，咁先至叫活學活用~~~
我不嬲認為，學習烹飪，最緊要嘅唔係要知道落佐幾多匙糖，幾多豉油，而係要明白，「點解要落糖同豉油」，咁先至係學習烹飪嘅最高境界。
所以係我BLOG度，都儘量詳細嘅將自己煮食過程嘅心得表述出嚟，目的係希望大家係我度，可以知道我點解要「咁樣煮」，而唔係好詳細咁話俾大家知，我「落佐幾多糖」。
4，將混合好嘅粘米粉，分幾次，趁熱倒入煮好嘅蘿蔔絲入邊，慢慢攪拌到粉同蘿蔔融合，跟住倒入炒好嘅臘味，咁個糕底，就整好啦。
（個粉最好用個篩整散，確保唔會一粒粒，然後先至篩到蘿蔔入邊）
5，最後，搵個糕盤，抹佐油，將上個步驟嘅粉倒入盤入邊，上爐蒸45至一個鐘。
蒸好之後用個筷子手插落去，如果無粉漿痴住，就表示蒸熟透啦。
我蒸佐45分鐘，然後熄火，用餘溫焗多15分鐘。就熟透啦。。。
睇下，蒸好啦。。。
趁熱落少少蔥花入去，香好多㗎。。。。
依個時候，凈係聞到個味，已經流曬口水~~~
擺入雪櫃雪一晚~~
今日早上就食得啦。。。
睇下，脫模脫得幾好~~~~
蘿蔔多粉少，加佐澄粉，就算減少粘米粉嘅用量，都唔會散開，咁就保證到可以食到蘿蔔嘅香味之餘，都能保持靚靚嘅形狀。。。
自己整，材料好豐富，聞落都香好多~~~
煎嘅時候，聞到濃濃蘿蔔香味，已經開始吞口水`~~
衝多杯咖啡，一個完美早餐就完成~~~
沒有留言:
張貼留言