老公吵著要去BBQ已經好耐，但係佢自己又鬼咁忙喎，都知佢好掛住我整嘅沙嗲味㗎啦，所以尋日去買佐兩舊雞扒返嚟，整返味沙嗲雞扒俾佢，慰藉下佢思念嘅情緒。
我用嘅材料都係香港好易搵齊嘅。
生料有「紅蔥頭、蒜頭、生薑、香茅」
然後加多幾粒炒香嘅花生，全部加埋，舂到碎。
我通常整香料都唔會用攪拌機，因為硬係覺得舂出嚟嘅味道會出好多，香好多㗎~~
另外香料方面用佐「荽莤籽粉、印度咖喱粉、椰粉」
同香茅一樣，全部可以係印尼商店買到。
份量要靠自己控制，好似生料咁，我唔想香茅嘅味太突出，所以凈係落佐二塊仔，蔥頭會好香，所以用佐五粒大大粒，蒜頭同薑只不過係為味道更豐富，吊下個味，所以少少落佐啲，香料主面，我主要係想突出荽莤籽粉嘅味道，所以落得最多~~
份量我都係自己一邊調一邊聞，覺得邊樣少佐再添加落去。
所有材料撈埋一起，落老抽，生抽，黑糖，鹽，咁就可以醃個雞扒了。
所有味道加埋一起，會係一种好特別嘅異香味~~~
醃緊雞扒嘅時候，有工人送貨過嚟，我簽收緊果陣，佢可能忍唔住果陣香味，好奇咁問我「你整緊餸啊，咁鬼香嘅」
哈哈，如果唔係咁香，老公又點會成日念念不忘啊。。。。
另外想提一提，出邊賣緊嘅荽莤籽粉，係就咁生磨嘅，如果想味道更突出，我通常會買一粒粒嘅荽苯籽返嚟，先白鑊炒出香味，然後先至磨成粉，咁個種味道，係比未炒香之前，香佐大約十倍咁多囉~~
強哥尋日落地盤，睇到下午六點幾鐘，跟住又要返公司與同事開會，一直開到晚上九點鐘先至返屋企，所以個雞扒由晏畫三點幾一直醃到九點，醃佐成六個鐘，已經好入味㗎啦。。。
本嚟係想用焗爐仔焗嘅，但係焗爐焗得太耐，老公打電話話就嚟返到屋企，咁唯有用個鑊去煎，會快好多。
醃嘅香味其實未算什麼，真正落鑊一煎，所有材料嘅香料一遇熱，先至真正散發出獨特嘅香味`~~
個鑊我唔落油，就咁將雞皮果面擺底，等熱力自己將雞油逼出嚟，然後先至翻身二邊煎至香脆熟透。。。。
老公到屋企嘅時候剛剛好煎好個雞扒，一睇到即時好開心咁話「嘩，有正正雞扒食，嘩嘩，係沙嗲味，正啊」
我好少買雞扒返嚟，因為好唔鐘意啖啖肉，又無雞味，不過咁樣用大量香料去醃過嘅，我都OK接受。。。。
凈係有個香味唔夠㗎，再用係印尼商店買嘅沙嗲羔，用水開佐佢配住
煎得香香脆脆嘅雞扒，配埋香噴噴嘅沙嗲羔，一流~~~~
炒多個蒜蓉油麥菜~~
搞掂~~
沒有留言:
張貼留言