食粥粉麵

素以「金剛不壞之肚」行走江湖多年從未出過差池，不曾想數十年之後竟被莫名病菌仔如山洪瀑發之勢入侵我嘅腸胃。短短一夜之間臉頰凹陷，四肢無力，全身發軟，眼神迷離，驚嚇無數。

好彩病菌只不過持續佐兩日之後都係鬥我不過敗下陣來，我無去睇醫生啊，實在上次去睇同一個醫生係因為「痾唔出」，依次再去睇返竟然因為「痾太多」？太過滑稽~~

以我睇書得來嘅經驗（老公聽到依句又要鹅我啦），病菌痾清之後身體自然無事，快則一日，慢則三日姐~~~以我咁「強健嘅體魄」，我好有信心係二日之內可以好返，果不其然~~~

肚仔肚仔，辛苦曬~~~

--------------------------------------------------

食清淡啲，煲粥。。。。

煲佐一大煲嘅腐皮瑤柱粥。。。。

一煲靚粥應係煲得綿滑之餘得見米花之形是謂一煲靚粥，我煲得好靚㗎，好綿好結嘅一煲粥，總可以睇得到係一粒粒嘅粥花樣~~

始終未能「食素」，所以都係整佐兩味小菜伴粥。

菜脯蛋，加佐少少瑤柱絲同蝦米，香好多㗎。。。。

先將菜脯粒同瑤柱蝦米用少少油爆出香味，然後倒入發散嘅蛋液入去煎成一塊塊即可~~

我無額外係蛋度落調味，因為菜脯瑤柱蝦米全部都係有咸味，已足夠。。。若食得味重者，可適當落鹽調味。

蒸佐碟肉餅，香噴噴。。。。

用佐婆婆嘅蒸肉餅材料「豉油糖生粉鹽，薑，蒜蓉」

香噴噴。。。。

 

可能出得貨太多，所以要補返好多能量，我食佐一大大碗嘅粥啊~~~

 

第二日晚餐，好想食河粉，而且係叉燒河~~

買佐一條叉燒，一斤河粉。

先落油熱鑊，爆香剁碎嘅蒜頭與豆豉（陽江豆豉，浸一浸水再剁碎）

然後加高湯落去，落較好味嘅肉碎入去，最後落沙河粉入去，熄火後加一大扎荽莤入去，食時面舖叉燒，加少少炸香嘅蒜粒，香噴噴嘅叉燒河，比街食絕對好味~~

好有信心，真係好味㗎~~~

 

第三晚，做法同前一晚嘅湯底一樣，只不過河粉轉成面。

三個晚餐，食齊粥粉面，肚仔舒服曬~~

我心目中所謂清淡，就係咁樣㗎啦~~~

 

城市之中已經佈滿石屎造出嘅森林，無奈嘅生靈，唯有選擇適應。

 

稍事休息之後，再度起行，繼續搵食，世界難撈，搵食艱難，又豈止人類~~~