生平第一次下廚的時間係2006年的11月2日。
之前一直都係同強哥在外解決一日三餐，好突然的一日，我就覺得我應該學煮餸，先至符合為人妻既形象。
於是即刻走去買齊基本的廚具與調味。
第二日買材料就開始郁手。
當時無論係煮餸或者對菜式的攝影，都無乜太大的經驗與體會。一切只憑感覺行事。
經過二年幾既入廚經驗，無論係對菜式或者攝影，都有佐初級既少少積累。
所以今日做佐一個小小的總結，誌在同大家分享自己的小小心得，希望所有的朋友，無論係菜式或者攝影方面，都能共同進步。
關於燈光。
事實上好長一段時間，我都係直接係廚房拍攝，利用的就係廚房好本原的形態，沒有任何的粉飾，靠的就是櫥櫃頂上二條暖黃色的光管為主要的光源。
用既係傻瓜機拍的像，全自動的功能，我能做的就只是構圖。所以拍出來的圖片，都係黃黃地，也沒什麼講究（實情係我根本唔知應該點樣解決依個問題，因此索性放任圖片變成黃黃舊舊既效果）。。。。
最近依一個月，因為棄用以前的餐臺，換到茶幾仔上食飯，而茶機係簡單的黑顏色，因此依家影出來D像底色都係黑色背景。
都係看圖說話比較簡單。俾大家發個幕後花絮的圖片，睇下我係點樣拍攝日常既餸菜既。
燈光，靠的係頭頂的一個射燈以及大廳的一個水晶燈制造的暖黃色光源，然後，係要拍攝主體（就是平日我拍的菜菜）既左後方，補上一個白色的光源（特價四十八蚊買返黎的一盞小臺燈），主體的右後方，用塊鏡（買化妝品送的，免費）利用光的折射，俾菜菜的右邊補上少少光源。
係茶幾的另一端，豎起一塊黑色的板做背景，咁樣拍起照片，底和後面就都係黑色一片，咁樣比較能夠突出主題。
關於燈光，因為光源離得比較近，好刺眼，拍出來的照片不夠柔和，所以我就搵黎幾張紙巾將燈包起來，自制成一個柔光燈的效果。
關於燈光暫時得咁多體會
關於渣機的姿勢。
1，見過好多圖片，大約都係用鏡頭咁樣由上往下直拍。
咁樣拍既好處係可以比較完整的將整個畫面展示出來。
缺點係拍出來的效果，會非常的死板。
因為食物無法透過鏡頭向人展示自己的味道，所以就只能靠拍攝者，利用角度，讓食物變得更為立體。
下圖係我05年，用自己四百萬像素的相機，拍娘親整既黃姜飯。
當時就係用直視的方式去拍既依張相，好彩，阿娘將食物擺放得非常整齊，所以睇起來都還不至於太難受。
因此我認為，係食物拍攝當中，比較不適宜經常用俯沖的方式拍，因為咁樣拍出來的食物會顯得比較死板。
但係如果遇上食物的主體較為扁平，而且需要將全部畫面都拍攝出來先至可以最好的展示出菜式的美感，就肯定需要用俯拍的方式進行，譬如下圖。
如果從魚頭部位用直視的方法拍攝，咁成張圖片只能睇到魚頭而感受唔到整體的美感，所以我就直接用俯拍的方式，從上對準下方的碟，拉遠鏡頭，來個全盤展示。。。
2，我大多數拍攝餸菜的時候，會用下圖的方式果樣，用鏡頭與食物形成平視的角度去拍攝。
咁樣拍既好處，係拍出來的圖片會顯得非常的立體，俾人有一種生動與跳躍的感覺。
壞處係如果拍攝的主體很扁，咁拍出來的圖片就只睇到碟的邊沿，幾乎看不到碟裏的餸菜了。
所以如果菜菜比較散而扁平的時候，就比較適合用第一種所講的“俯沖”的方式去拍攝。
譬如下圖，就係用平視的鏡頭去拍攝出來的，係唔係就顯得非常的有立體感，而且食物好似就在眼前真實擺放著的感覺一樣。。。
當然，唔係所有扁平的食物就一定要用俯沖的姿勢去拍，如果盛載的容器無乜邊沿的話，當然都可以用直視的方式去拍，咁樣更能突出主體的某一處的特征。
好似下圖的肉幹，邊邊比較香脆，色澤鮮艷，為佐突出依個食物的主要特征，我就將肉幹放在無突起邊沿的一個鐵架上，用直視的姿勢，焦點集中在肉幹的邊沿，去表現依道食物最吸引人的地方。。。
3，算係界乎俯拍與直視之間，鏡頭略略提高，又往下傾斜一少少。
通常咁樣拍攝的對象，都係擺係杯裏，或者碗度，煲裏的食物。
因為容器較為高身，食物裝係裏面，如果用直視的方法去拍，能拍到的只有容器而體現不出容器裏的食物內容，因此要稍稍提高鏡頭，讓鏡頭有一個弧度，既能表現出容器的立體感，又能睇到容器裏的食物狀態與內容。
關於渣機的姿勢大致就咁多。
關於構圖。
構圖真的比較難解釋。因為要因應唔同的食物形態而做出不同的反應。
對於構圖，最直接的睇法，就係要如何用最佳的角度去傳達出依味食物最優秀的一面讓別人睇到。
首先，我好少好少會將鏡頭對準一碟食物入邊既某一處拍攝。
以前我就會將食物拉得好近好近的距離拍攝，咁樣成張圖片睇起來，非常可怕，無一D既想像空間。
太直接太赤裸的表達方式，有時比較令人難堪。
好似下圖，我將鏡頭全部都集中係一碟散收收的豆腐上。
咁樣睇落就太油膩，一點美感也無。
所以依家我再拍依類散散的食物，都會將佢地集中係一個容器度，然後將成個容器的狀態都拍出來，將鏡頭拉遠少少，讓食物安靜地躺在它合理的位置，視覺上，都有一個緩衝的效果。
睇起來，是否舒服好多。。。。
但係有D食物一堆的集中起來的時候，又真係好難表現出佢既美感，
因此就需要讓食物的個體活動起來，俾其中的一個個體來一個單獨的寫真照，咁樣能夠產生一種比較唯美的視覺效果。。。。
關於美食的拍攝，總有好多好多既睇法，不過無法一一表述，只能將大概的心得與大家分享。
其余的細節，只能靠個人多D觀察，多些總結，對於美食攝影，我都還在不斷的摸索過程中，依家先將自己暫時得出的心得記錄落黎，與大家共同分享，希望大家也不吝賜教，如何才能讓攝影變得更精彩。。。
當然，我想每個人眼中的美都會有所差異，因此拍出來的東西未必會產生同樣的模式，但最重要既，我想都係要產生個人獨特的風格。。。。
------------------------------------------
聽日開始，強嫂將離開一段時間，依段時間本臺節目將暫停播出，都無法對大家的問題做出及時回復，尚請各位同學多多見諒。
沒有留言:
張貼留言