早輪惠康牛肋條特價，我依D精明既師奶仔當然唔拾輸，即刻入佐幾包返黎慢慢嚼。。。
早排天氣凍一凍，我依個做大嫂0既，即刻拎出大嫂風範，俾電話幾個細佬「阿嫂整佐蘿蔔牛腩煲啊，聽日返屋企食飯啦」
強哥四兄弟，個個一識得女朋友就即刻搬佐出去，平日老爺都係漁排，係周三跑馬仔先至會落返黎奶奶度，咁通常奶奶都係得一個人係屋企，咁始終年后仔女，都希望有多D私人空間，所以奶奶都唔會要求我D成日返去，但係做得人地媳婦既，多少都要識得大體，時不時都要扯埋老公返去探奶奶，因為我同奶奶感情都好好，所以幾兄弟之中，係我同強哥返得最密，但係老人家，始終個個仔女都係佢既心肝寶貝，所以時不時，我依個做大嫂既，就要出聲出計仔，叫得幾個叔仔帶埋老婆齊齊返去奶奶度聚一聚，等老人家開心下。
無好話依D叫虛偽，我始終相信一個人對長輩如何，它日亦都會收穫返下一輩對自己相同既態度，所以今日種下如何既因，它日定必會收成如何既果。
依日整佐一煲幾兄弟至愛既蘿蔔牛腩煲。
整牛腩，我就絕對唔會用快速煲整啦，最靚係用瓦煲慢慢分幾次燜煮個口感最腍最好味。
我依次就係用佐個舊既鹵水，咁第一次個鹵水點較咧，如下所示
材料：冰糖三小粒，姜一塊切片，八角二粒，桂皮二小片，陳皮一塊，五香粉一小勺，鹽一勺，花雕酒一小碗，醬油二碗，水五碗。
煲法：提前一晚，將所有材料扔一塊煲一個鐘左右，放置不理，第二天中午再開火半個小時，晚上加了一個蘿蔔進去，再開火煮了十多分鐘~~牛腩就已經完全酥軟入味啦~~~
如果有時間，可以分三日燜，總正~~
（分段式燜煮法，我謂之）
睇下我個千年鹵水，膠成一舊。。。哈哈哈。。
其實只不過係用佐幾次，但係個味已經好好味。。。
同埋燜牛腩我都會再買埋斤幾既牛孖根放落去一起燜，點解？因為牛孖根本身係無味，但係佢含有豐富既膠質，同牛腩一起燜，會令到成煲牛腩更加香濃軟滑，我阿娘係牛腩痴，下次又整多一次叫阿娘過黎食，我自細未見過佢出街食粉面，有食過牛腩以外既野，幾有恆心啊。。。。
因為煲牛腩係第二日先至拎去奶奶度大家食既，所以當晚我都要佐少少腩汁黎整腩面做晚餐。
個湯底就要一匙味噌醬，一大扎中芹碎，一大湯匙腩汁，少少花椒，然后倒D滾油落去淋香個花椒粉，再衝滾水落去，就成為一個好靚好美味既腩汁湯底啦。。。
其實用中芹，比平日用蔥或者韭黃，更添多一份幽幽既清香，加埋少少花椒粉既惹味，配搭上腩汁既美味，味噌既咸香，依個湯底，正。。。。
燜牛腩阿娘自細都係開佐火，滾半個鐘左右就熄火由得佢自己焗，過得幾個鐘之后又再開火再滾半個鐘又熄火浸過夜，第二日食之前再開多次火滾多半個鐘就已經係好腍了，但果一日，我凈係開過二次火，加加埋埋燜佐一個鐘，但係估唔到，已經好腍啦。。。。
整牛腩面，凈係要個腩汁，另外整返熱一盒咖喱魚蛋送面，留多D牛腩第二日俾幾個細佬食多D啦。。。。
一個食面，一個食米。。。。
食到我同強哥捧住個肚啊。。。。
浸佐一晚既牛腩，可以加蘿蔔入去燜啦。
先留定一碗仔鹵汁先，咁下次加D豉油八角果皮薑，再加D柱候醬，又燜多一次。。。。
碗鹵水，越黎越濃。。。。。
蘿蔔吸收佐腩汁，一流啊。。。。。
凈係腩汁撈飯，幾個細佬相信都可以扒多幾碗飯啦。。。
記得提早打定電話叫奶奶落多幾杯米添啊。。。。
第時我同強哥變成咁樣既公公婆婆，無晒牙既時候，我都會整返咁樣一味腍到無需牙力既牛腩俾佢食。。。。
等我地倆個慢慢用牙床，磨下磨下個味罷啦。。。。。
沒有留言:
張貼留言