菜係一個晚餐必不可少的配搭，少佐碟菜既晚餐，真係會感覺若有所失，是日晚餐既青菜，係油麥菜。
凌亂的切邊代表係用手折斷既菜梗，通常可以用手整得斷既菜我都唔會用刀切，因為一經刀切過既菜，食起上黎必定會有少少刀既鋼鐵味，不如全手工操作既天然味道來得清純。。。。
一碟清爽既蒜蓉炒油麥菜。。。
以前用平底鑊煎過孜然薯仔餅，做法大概係刨佐絲既薯仔再成餅咁擺落平底鑊度煎成形，然后再洒孜然辣椒粉調味。
依日屋企凈有一個中等大細既薯仔，切絲炒似乎又少佐D，所以靈機一動，整個唔使面粉既PIZZA，用個薯仔充當餅底製作。
做法：
1，先用刨將薯仔泡絲，用刨仔會刨得再幼D。
2，然后係刨好既薯仔絲里邊加入「牛油一細舊仔，忌廉二湯匙，黑椒同鹽適量」，將調味同薯仔絲撈勻。
（刨好既薯仔絲千祀唔好過水，因為薯仔本身含有豐富既澱粉質，如果過水就會將薯仔本身既澱粉質全部洗晒，咁就好大程度影響佐煎或者焗好既薯仔餅既凝固效果。）
3，將撈好味既薯仔絲舖入耐熱容器之后，上焗爐，二百度火焗二十分鐘度。
係度我想講下自己對於光波爐既睇法，光波爐基本既工作原理係靠頂頭個蓋既發熱管去進行加熱，同傳統焗爐既工作原理係根本相同，區別只在於光波爐既外形同傳統焗爐有好大既唔同，佢係透明既玻璃兜，完全係一個玻璃碗既狀態，靠既主要係頂頭個蓋去做野，咁清洗就比較方便，但缺點係佢凈係得個上火，所以焗制食物既時候，就好需要俾心機去控制個火候。
我用光波爐既頻率似乎幾高好，咁無計架，因為買佐唔用好晒架，煮唔同既食物都需要配合唔同既工具去做，我只不過係當光波爐係一個焗爐咁樣去用，無係話佢特別好用，而係因為我凈係得個光波爐，而無微波爐同傳統焗爐咁解，所以使用的頻率相對會較高咁羅。
如果依個爐仔壞佐，我會轉買過一個傳統箱仔既焗爐，咁樣有上下火控制既焗爐，煮起食上黎，真係方便好多。。。。
4，二十分鐘之后個薯仔餅底已經焗得好靚
5，好似整披薩咁，擦一層茄醬係個面度。
6，用MOZZARELLA芝士，先至會有拉絲效果
7，芝士先切佐部份做粒粒舖係蕃茄醬之上，然后再將腸仔切薄片，舖係芝士上邊，最后再舖多層芝士係最上邊就搞掂。
然后再上焗爐焗至表面變金黃色。。。。
因為都係試住咁整，出黎既效果都好好，好適合下午茶時間享用，薯仔餅底因為有牛油黑椒等調味，焗好之后無論口感或者味道都好正，比較失敗之處我覺得係果層蕃茄醬，因為味道太濃洌，起唔到承上啟下作用之餘，總有少少搶佐薯仔同腸仔既味道，所以下次我會諗過轉過第二种醬汁去配合餅底同腸仔，或者奇妙醬會好D？
無論點都好，想像同創意之后將之變成現實，總是令人快樂的~~~
另外上次得BLOG友提醒，整無錫排骨。
係深圳一間所謂正宗蘇菜菜系既酒樓食過一味無錫排骨，一食之下大為驚愕，原來個味同我阿娘平日整開果D糖醋排骨竟有九成相似。。。
依日諗起糖醋排骨，咁就用佐阿娘既做法去整自家味道即所謂無錫排骨啦。。。
買黎一字排，先用少少鹽同糖，同埋一個蛋清醃入味。
1，然后醃佐味既排骨落多少少油，大火，炸到表面金黃。
2，原鑊，留少少油，落紅糖，生抽老抽，加水燜。
3，燜到中段時間，落醋，我用既係陳醋，平日阿媽煮開係用白醋，不過我係酒樓食過，個味係用既陣醋，咁我又跟住用陳醋羅，陳醋既味真係會香過白醋，煮出黎成碟野，似足酒樓果D。。。。
因為加佐糖同老抽，收佐汁既排骨，色水真係好靚。。。。
而且味道酸酸甜甜，又香噴噴，排骨本身已經燜得好酥軟入味，愛黎送飯下酒，一流~~~
普通人家既晚餐，一樣可以好精彩~~~
沒有留言:
張貼留言