紅燒

買佐兩件佈包豆腐。

紅燒當中嘅紅代表係豉油，燒即係北方人講嘅「煮」，紅燒即係指用豉油去燜煮食物的一種方式。

尋日整紅燒豆腐。

豆腐切一件件，落油炸透。用一個碗仔去炸物，咁樣用油較少。

炸至金黃即可，我無乜耐性，略略炸成差唔多就撈起啦。

準備其它配料：

「薑絲、香菇絲、榨菜絲、肉絲」

做法：

1、先將薑絲同香菇絲爆出味道。

2、肉絲我就簡單地用豉油糖生粉醃佐味道，然後落鑊兜一兜，最後轉色之後俾少少幾滴老抽入去，咁肉絲就會香好多㗎啦。

3、炒好肉絲之後，將所有材料一起掉入鑊，落水，加面豉醬，少少糖，燜五分鐘左右即可。

4、起鑊前，俾一扎蔥段入去。

一味紅燒豆腐，就煮好啦` ~~

炸過嘅豆腐表面較為粗糙，咁樣燜煮嘅時候，所有醬汁的味道就會走哂入去豆腐度，咁樣食起上嚟嘅豆腐，超好味㗎~~