牛腩

尋晚整佐一煲牛腩，咖喱味。

碟頭上，同強哥一人一大碟。

試一啖，強哥俾四個字-----

「無與倫比」~~~

做法如下：

1、洋蔥大量切碎，用油炒軟，俾少少老抽爆出洋蔥的香甜。

2、倒入印度咖喱粉，用油炒出香味，我總落埋少少蒜蓉。

3、牛腩略略飛過水，倒入去同炒，為增加風味，落多少少辣椒同炒。

4、落水，落鹽、糖，一細細粒的八角，總有一匙芫莤籽粉增加風味。

 

少時讀吳承恩的西游記，只覺奇怪，想那孫悟空一個筋斗已十萬八千里，為何還要師傅唐僧一路苦行，斬妖除魔，歷經九九八十一難，先可以到達西天取得經書，如此擾攘，何不叫悟空背負師傅，一個筋斗直達目的，乾手凈腳咧？

時至今日才略有所悟，西去取經目的不止於經書，更在於一路遇妖撞魔來增強對自身的苦修，才是真正取得所成的必修之為。

道理放諸四海而皆準，同樣的修為之說，一樣適用於燜煮牛腩一事上。

雖然今時今日有樣嘢叫做快速煲，可以極短時間之內將食物燜至極腍軟，但係同母親試過唔同煮法之後一致認定，牛腩用快速煲極速煲軟嘅口感雖然非常之腍軟，但肉質食起起絲乾硬，遠不及慢火炖煮之後的牛腩，食起軟滑腍軟，快速煲煮好的牛腩，醬汁的味道只膚淺地掛係牛肉的表面，不若慢火炖煮之後的牛肉，醬汁的味道完全滲透直達牛肉的每一個細胞，就算唔點醬汁就咁凈食牛腩，都依然能夠食得到好濃味的調味，即係所謂的「入味」。

就算煮牛腩，都一樣地「欲速而不達」~~~

所以燜煮的方式無捷徑，慢火炖煮係唯一的方式。

5、開細至400度火

6、慢火之下，炖煮半個鐘，然後熄火焗多一個鐘，再開多次火，再炖多半個鐘，然後就可以熄火，轉過另一個煲仔，攤凍後擺入雪櫃雪一晚。

牛腩較多油，凍佐一晚的牛腩，表面好多油瓊住，趁機將油片走。

7、晚餐之前，將薯仔擺入去，開細火燜煮多30分鐘。

三焗三煮之下的牛腩，已經完全腍軟，洋蔥已經悉數融入醬汁之內，醬汁加入薯仔之後，亦變得非常濃稠，煮滾之後，成屋飄香~~~

洋蔥的地位其實好關鍵，洋蔥加埋咖喱嘅味道係好格㗎，同埋洋蔥本身的香甜，可以俾咖喱帶來一份天然的甜味，

咁樣一份碟頭飯，最美味嘅，唔係牛腩，亦非薯仔，而係---

一啖醬汁配上一啖香糯軟熟的白飯，咖喱獨有濃郁的異香，配以純粹的米香及其獨有的清甜，飯桶如我，只覺「無與倫比」~~~