白菜

今晚返到屋企都差不多七點咁滯，如果唔係今朝出門口前預先醃定佐啲牛肉，驚今晚唔煮就會變壞，嘥哂啲牛肉，真係好懶得再落廚。

返到屋企俾電話強哥，佢總係灣仔就返嚟，本嚟真係想放棄煮飯落街食㗎啦，聽到佢總要大半個鐘先返到屋企，咁雪櫃又有餸，都係堅持下，煮埋餐飯算啦。

完全體會到平日全職要返工嘅人，收佐工返嚟總要煮飯嘅果種辛苦法~~~

我未試過六點幾咁夜先係街市買菜，原來真係無咩葉菜好選擇，睇到啲菜真係唔開胃，求其買佐啲白菜仔諗住同牛肉一起炒，然後再買幾個薯仔，唔洗點洗嘛，睇下點配搭煮埋餐飯。

咁就蒸埋碟飯先，蒸飯點都要二十分鐘先蒸得好，咁蒸飯嘅同時，就去洗菜。

牛肉早上已經預先切好醃好味，所以只需要再洗啲白菜仔，就可以開始炒菜。

好家常嘅一味白菜炒牛肉~~~

惹味好餸飯~~~

炒薯仔粒，薯仔唔需要點洗，削好皮，切粒粒就煮得。

我就煮佐一味「孜然薯仔粒」

哈，又真係幾似街食果啲喎~~

半個幾鐘煮好餐飯，強哥都剛好返到屋企，開飯~~~

原來煮飯嘅其間總可以抽空拖好埋地添㗎~~

不過好奇怪喎，又唔會覺得攰喎，係有少少覺得懶係真嘅，所以強哥就叫我依排唔好再煮飯，我好聽話㗎，佢話唔煮，我就奉旨唔煮啦，哈哈哈~~