如果就咁睇張圖片，你會認為佢係咩包？
強哥收工返嚟，遞半邊包包俾佢，先要佢估下，係咩包。
望下個包包，答我「奶黃包？練奶包？」
叫佢自己試一啖
一試之後，揚一揚條眉：
「OH！Good！芝士嚟㗎！」~~~
尋日晏晝想整啲第二日早餐。
屋企又無乜材料，本嚟想整饅頭，早餐可以配牛油果醬食。
望到雪櫃凈有少少芝士，幾條腸仔，咁又搞搞新意思，嚟個全新組合。
一舊發麵團、一碗仔芝士，兩條香腸。
就足夠整份包點所需。
芝士用嘅係Mozzarella 芝士，味道較淡，煮好後嘅口感夠煙韌，愛嚟整包包一定最好。
唔想凈係芝士咁單調，切佐啲煙肉粒粒，先落鑊爆一爆，等個香味出佐嚟，再倒入去同芝士撈勻，因為煙肉同芝士都會帶有咸味，所以無需額外俾其它味道。
儘量地包入多啲餡，咁食落先夠味嘛。。。
因為芝士凈返唔多，包得三個包包就已售罄，所以其它嘅麵團，要再整多幾條腸仔包。
因為蒸得包包少，所以直接用個平底鑊去蒸，都費事擸個中式高身鑊出嚟，搵一個低架，擺個蒸架上去，擺埋個包入去，落啲水無需太多，咁蒸嘅時候就唔會因為水滾得太勁搞濕個包底，並且蒸包嘅時間不宜太長，中火蒸佐7、8分鐘足夠。。。。所以水唔洗落太多，有淺淺一層足夠產生蒸氣就好啦。
個包包底下，總有嘢㗎~~~
我係絕對唔會浪費任何資源嘅，蒸包之前，先用同一煲水，愛嚟熗熟啲花生，最後8分鐘，擺啲包包入去一起蒸，上邊蒸包下邊煮花生，一啲資源都唔會嘥~~~
有包包食，有花生食，幾開心~~~
蒸得靚靚嘅包包，第二日嘅早餐，好好味~~~
切開嚟睇下，真係好正㗎個芝士包，有濃濃芝士味，加埋煙肉嘅惹味，同芝士嘅味道好搭，因為用嘅芝士係比較可耐高溫嘅生芝士，而且比較硬身，所以咬落係會食到芝士煙韌嘅口感㗎，鐘意芝士嘅人，真係不妨一試，咁樣整出嚟嘅芝士包包，真係唔錯㗎~~~
沒有留言:
張貼留言