中秋快樂啊各位網友~~~
上個星期六已經提早係出邊慶祝過中秋㗎啦~~
實際上依家好多傳統節日，早已式微。過時過節，不過係一家人聚埋食餐飯，食完離場各自返歸，根本無乜特殊感覺。不過有個籍口，等成家人聚埋食餐飯，點都聊勝於無嘅~~~
最好笑係二佬，次次家庭聚餐，佢女朋友都剛好有事唔嚟得，真係難為佢次次要諗過唔同籍口同屋企人解釋，真係好想同佢講，唔鐘意嚟就無勉強，大家一年都見唔到一次，同佢「女朋友定老婆」真係唔係咁熟，嚟唔嚟無乜所謂，搞到次次要講大話，真係為乜咧。。。。
反正佢女朋友一啲都唔識得尊重男朋友屋企人，見唔見都罷啦。
點唔尊重？上二個星期前老爺氣管炎入院住佐二日，真係稀客，二佬女朋友會嚟探「世伯」，咁耐無見，離遠見到二佬同佢女朋友，我就大動作搖手同佢啲「Say Hi」，點知佢女朋友真係黑面神轉世咁，面無表情，直行直過，搞到我覺得自己勁白癡。。。下次再見真係搵鬼睬佢囉。臨走時四佬老婆同二佬女友講Bey bey，佢亦都同樣俾個「冷冷的背脊」大家嘆下，講真，我哋成家人咩地方得罪佢真係全無頭緒，咁樣對男友屋企人，真係好無禮貌。
算啦，反正一年都見唔到一次，話知佢性格古怪~~
~~~~~~~~~~~~~~~~~~~~~~~~~~~~~~~~~~~~~~~~~~~~~~~
尋日晏晝煮佐一個肉醬。
材料有「免治豬肉、薯仔切粒、五香豆腐切粒、一碗仔牛肉醬」
牛肉醬係好多年前表嫂介紹話好好味，後嚟一路都偶爾會買返包擺住，好簡單地用包醬再加啲牛肉或者豬肉去煮，就已經好好味。
香港買唔到，要過深圳超市先有得賣。
先醬肉碎炒散倒入薯仔同豆腐粒少少甘筍粒，加水，將牛肉醬倒入，煮15分鐘。
最後俾少少生粉水埋個芡，搞掂~~~
好香㗎依味肉醬~~~.
一次煮多啲擺入雪櫃，拌面或者撈飯食，都一流㗎~~~
強哥尋日晏晝無返嚟食飯，我自己淥佐一個面線，撈肉醬
俾少少蔥花，香噴噴。。。。。
夜晚。
韭菜花炒牛肉，強哥好鐘意食韭菜花，咁一炒一大碟，食夠。
滾多一個蕃茄薯仔肉碎湯。
簡單~~~
我最愛係蕃茄湯撈飯，正~~
沒有留言:
張貼留言