咸菜黑椒排骨湯、火鴨絲炒芽菜

咸菜黑椒排骨湯

因為我凈係滾一煲仔湯飲，所以材料唔洗太多。

一條排骨，半邊咸菜，十幾粒黑椒，一塊薑拍碎

排骨飛水，然後所有材料掉入煲度，開中火煲半個鐘左右~~~

飲得`~~

簡單到閉~~~

湯渣撈起點美極豉油~~

又係餸一碟~~

之前一日食燒鴨，留起少少胸肉。

起骨，將啖啖肉切絲。

準備半斤芽菜，半邊洋蔥，火鴨絲，青椒絲、薑絲、蒜蓉。

笠笠雜雜炒埋一碟餸。

雖然不過係炒芽炒如此簡單的一味小菜，不過我都想講一講對於炒餸嘅少少淺見。

相信入廚之人大多能夠認同，要將一碟菜炒得好味，其實比之燜煮肉類，更見功夫。

自細耳濡目染父母係廚房互相討論煮餸嘅方式與心得，成年之後，對於自己入廚，有極大幫助。

父親一向最反對炒菜嘅時候，隨便落鑊炒幾下，就即刻落水去燜熟嘅方式，認為這是最為原始的烹調方式，其實可以更為講究。

以炒芽菜為例

1、唔洗落油，凈鑊燒熱，倒入芽菜，干炒一分鐘左右另外置碟，目的係炒走豆腥，唔好炒太耐，芽菜無佐水份就失去靈魂

2、原鑊落青椒薑蒜，俾少少油，爆出香味。

3、倒入火鴨絲同薑蒜等物炒出香味，再倒入洋蔥同炒。

（一路唔洗理個鑊，等佢自己產生一啲金黃色嘅物體，啲食物同依啲物體炒勻之後，會自然就有一種類同「鑊氣」嘅味）

4、最後倒入芽菜，俾少少鹽，炒勻，裝碟~~~~

全程五分鐘都唔洗，一碟炒得香噴噴，一啲多餘嘅油份同水份都無，咬落芽菜脆卜卜，鮮甜嘅味道油然而生，芽菜嘅爽，同火鴨嘅香，相得益彰！~

老公話依碟火鴨絲炒芽菜，掂～～

我減肥，飲碗湯，食幾啖菜，夠~~