住家小菜---咸蛋節瓜湯、彩椒炒鹵肉

今日早餐---兩片麵包、兩條香腸、炒滑蛋

加埋一碗麥皮、一杯咖啡。

老公未衝好涼出嚟我已經整好啦，咁樣一個早餐，又方便又快捷~~

兩公婆早上一起睇下新聞，講下今日計劃，食下早餐，唔洗話要食得幾好幾多，但求有個交流，每日就由一個開心早餐開始~~~

一人卷一個腸仔包，簡單美味~~~

尋晚節瓜滾湯。

切條嘅方法有好多，視乎唔同食材，我會有唔同切法。

節瓜切條，我會打斜橫切圓片，越斜個橫剖面就越大，咁樣切出嚟嘅條狀就可以儘量地長。

切佐圓片出嚟，再豎切就成為條狀~~

因為係滾湯用，所以圓片可以稍切厚身少少，咁切出嚟嘅條狀，就會粗條啲啦，反之，如果圓片切薄身，咁切出嚟嘅條狀，就會幼身啲。

咁樣嘅方式處理切條狀有一個好處，切好後兩頭都可以有邊位，中間嘅芯位，都一樣可以保持係中間，咁樣煮起上嚟無咁易煮散。

因為有網友問我點樣處理啲食材，所以儘量多同大家分享下自己對食材處理嘅心得啦。。。

 

滾湯材料好簡單「薑一塊拍爛、咸蛋黃二粒蛋白一粒、免治豬肉少少、節瓜切粗條備用」

滾湯通常蛋都會最後落，薑凍水落，節瓜可以同薑一起落煲滾水，肉要等水滾後再落，就唔會起好多肉泡泡。。。。

滾湯無乜特別，只要注意落嘅次序，基本上無乜難度。

依款湯水無落鹽，因為咸蛋係咸嘅，肉又醃過味，啖湯已足夠味，就無需再額外俾鹽啦`~~

買佐盒彩椒。

又想樣樣色都要，但如果全部落又太多，咁就一樣切半。

剩返果半，用紙包住再用袋入住，可以擺幾日都無問題`~

俾少少蒜蓉爆香個鑊，倒入彩椒炒至軟身，然後倒入切好片嘅鹵甜肉同炒，加埋少少鹵汁，炒幾下，起鑊~~

簡單~~

最後，用節瓜湯撈飯食，正~~

不過細個時阿媽唔俾我用湯撈飯，阿媽話小朋友咁長期食湯飯對個胃唔好，係咪㗎。。。

依家無阿媽管，湯飯，無妨啦~~