「食譜」蠔香辣炒菜脯

有無見過下圖包法嘅粽？

舅母嘅阿妹係鄉下落嚟香港玩，帶佐幾隻剛剛整好嘅粽俾我，依個包法，我阿媽都唔係好識得包添㗎。。。。

用柴火煮佐三個幾鐘嘅粽，唔係香港平時買到嘅竹葉包嘅粽，而係大大塊嘅另一種粽葉，蒸好嘅粽別有風味~~~

用佐本地香糯嚟整，口感軟糯氣香，加埋清香粽葉，好好味㗎。。。

一條大大條，同強哥兩個人食一個做早餐。。。。

好好味㗎~~

~~~~~~~~~~~~~~~~~~~~~~~~~~~~~~~~~

無拉拉想食啲香口惹味嘅小菜添，即整碟~~

材料有「蒜蓉、五花腩切粒、辣尖青椒、菜脯切粒」

做法：

1，五花腩切粒後，就咁倒入鑊慢火煎出油。

唔洗再落油㗎，佢自己會出油，俾多少少耐性慢火煎。

未幾，就將肉炒至乾身。

自己走佐好多油出嚟~~~

2、然後原鑊，就住逼出嚟嘅豬油，爆香蒜蓉。

3、倒入青椒翻炒至軟身

4、倒入菜脯翻炒至出香味

5、倒入蠔油調味，略為翻炒入味即可~~~

以前一直覺得自己炒得永遠唔及阿媽嘅好味。細問過阿媽做法之後發覺，自己為令味道更為均勻，往往會後加少少水去略燜，反而就係咁樣一加佐水，令到青椒失去清香，菜脯失去爽脆，簡直係一大敗筆，同埋我以前係用免治豬肉整，無五花腩出嚟嘅效果香，依次我整出嚟嘅味菜，真係正~~~

晏晝碌個面，煎個蛋，一大匙香辣嘅味菜，正~~~

~~~~~~~~~~~~~~~~~~~~~~~~~~~~~~~~~~~~~~~

晚上凈有檸檬鴨比兩隻，整返熱佢~~~

想食叉燒，咁又斬佐半斤返嚟。

一時提得慢佐啲，師傅幫我切好片~~~

咁晚上要食，唯有再加返熱佢。

一係入焗爐，我又懶得預熱。

咁就最簡單，包住錫紙，隔水蒸三分鐘。

快靚正~~

錫紙極好地隔絕水氣，形成一個蒸焗嘅效果，咁整返熱嘅叉燒，熱得嚟，唔會因為過濕而失去燒味獨有嘅香氛~~~

依排好鐘意食芥蘭苗，甜到不得了~~

簡單地白灼淋蠔油，已經好好味~~~

叉燒最後凈返好多，留第二日食叉燒炒飯~~~