尋日又買到一樣心頭好。
依樣係可以共諸同好嘅小玩意。
一直用開電磁爐，不過阿媽驚有幅射問題，由第一日開始用就一直碎碎念，驚長期使用對身體會有不良影響。
因為有計劃出年會要小朋友，阿媽就叫我用返明火煮食，俾佢提得多，其實都心諗住要換個爐嚟用啦。
舊年開始係街邊見過有一款「光波爐」做緊promote，講明係無幅射，外形同電磁爐一樣，（同我以前買果款光波爐大家叫法一樣，不過功能完全唔同）當時睇到已經好有興趣，不過因為覺得佢唔靚仔，同埋係雜牌仔，所以遲遲未敢搬返屋企。
早兩日上網查相關資料，俾我搵到另一款叫「電陶爐」嘅爐，個工作原理係利用遠紅外線乜乜去加熱嘅，相較電磁爐，佢又無幅身，又可以隨便用任何鑊都可以煮到嘢，好吸引人。
香港未見過有售，咁就上淘寶搵下，又真係俾我搵到喎，比較過眾多品牌之後，選擇佐一款比較靚仔，而且係Touchscreen嘅電陶爐返嚟，成塊面板係一體過，個樣好靚仔啊。。。。
我係淘寶都買過幾次嘢，服務真係好好，當時頭腦發熱，下晝五點幾落單訂貨，點知第二日早上十點，已經收到貨，又真係快得好緊要。。。
今日晏晝就用佢整嘢俾老公食。
相較電磁爐需要通過鑊先可以加熱食物，依款電陶爐可以直接發出熱力，直接係表面就可以加熱食物，可以話係有電磁爐嘅方便使用功能，又有明火嘅特點，最緊要係佢絕對無明火會產生嘅任何氣體，只有熱能㗎。。。。
我今日晏晝，試玩下燒烤嘅功能。
擺個鐵架，放兩條青椒，兩條腸仔上去，開BBQ嘅功能，然後定好時間，加熱7分鐘，咁就由得佢自己加熱啦。
基本上佢凈係爐嘅中間會發熱，周邊嘅溫度係普通室溫。
所以我係側邊擺個燒烤醬，都絕無問題，唔會燒壞嘢~~
火力要自己調較，我開到600W就已經足夠慢慢燒透啦。
有一個問題，就咁燒嘢，始終會有汁滴落去，而且加熱之後會痴得好實，我用濕佈抹都抹唔走啲燒焦佐嘅汁。
反正我都預佐係粗用，所以乜都試下。
落少少洗潔精，少少水，趁住爐總有少少餘溫，用易潔佈大大力去省~~
掂啊，干干凈凈~~~
老公未返到屋企，所以我又開返少少火後再熄火，咁用餘溫去暖住啲食物~~~
哈，真係好好玩啊，燒得真係好正~~~
強哥返到嚟，咁即刻再煮個面。
直接擺個碗上去加熱。
開大火之後，可以睇到轉成紅色嘅爐心，就係果度最熱啦~
雖然係好熱，不過相較電磁爐，佢煲滾水嘅速度會慢好多。。。。
依個未掌握到個技巧，要慢慢再研究下。
雖然水煲滾得慢，但係有一個好處，水滾之後，可以熄火，落面~~
因為個爐本身總係好熱，熄佐火之後，我睇住碗面，繼續係咁滾下滾下足有二分幾鐘，表面溫度總係好高㗎。
只要掌握到箇中技巧，咁咪係好節省電費~~
好玩~~
沒有留言:
張貼留言