香煎千層酥餅（食譜）

其實原本係想整發面大餅嘅，點知個酵母可能過佐有效期，竟然個面團點都發唔起喎。

咁就改為整千層酥餅啦，反正千層酥餅都係用唔洗發酵嘅面粉嚟整。

咁材料你就當睇唔到個酵母啦。

材料：

「面粉一碗，炒香免治豬肉適量」

面粉入邊我落佐少少油同白糖。

做法：

1，加暖水將面粉搓成面團，然後擺係室溫20分鐘左右，等個麵粉同水份吸收融合，產生筋度。（我用普通中筋麵粉嚟整）

2，免治豬肉我就落豉油俾味炒熟，然後加蔥，加少少豬油，加花椒油撈勻。（加豬油係可以令到面粉起酥，加花椒油係會香好多）

3，將面團分割成細團，然後搓成一大塊薄片。

4，將步驟2嘅餡擦到步驟3之上。

5，然後一路卷起成條狀，跟住盤成一個圈。

6，再將上步驟嘅面團，壓扁搓薄成面坯。

（其實依個時候已經可以直接煎嚟食啦，不過我係要做早餐，所以會就咁整好嘅面坯擺入雪櫃雪一晚，第二日早上再煎）

我有幾隻超大嘅碟，你睇下，我一個碟就可以擺到三個面餅，而我一個面餅，差唔多同個鑊咁大啊。。。

7，將面餅兩面煎至金黃色就搞掂啦。

因為我係用生鐵鑊去煎，我驚會痴底，所以落佐多少少嘅油去煎，上個星期我唔係屋企，強哥自己腍住用依個鐵鑊去煎午餐肉，點知痴到阿媽都唔識，我一返到嚟就同我投訴個鑊唔好用，哈哈哈，其實係佢掌握唔到個技巧姐。。。

通常生鐵鑊我會先開火等個鑊燒興佢，然後落少少油，跟住熄細火，將食物放入去，煎半分鐘左右，等食物表層熟佐，咁就會自然同鑊分離啦，好輕易就可以翻個身，繼續煎另一面。

用生鐵鑊煎嘢，煎出嚟嘅食物，確係香脆好多㗎。。。。

同易潔鑊比，煎出嚟嘅效果，無論係外形定口感，都真係會有分別。。。。

煎好嘅餅仔，一開四，食得~~~

基本上二三分鐘左右可以煎好一個餅仔~~~

提早一晚整好個生餅坯，第二日早上只需要少少時間，就可以食到新鮮美味嘅煎餅啦。。。。

 

唔知係咪擺佐一晚嘅關係，個面粉起酥嘅效果，真係好正啊。。。。

我用吸油紙吸走佐多餘嘅油份，依個餅仔，因為係自己食，唔會好似出邊咁，加佐好多好多瑪琪琳，香精味又重，又多油好肥膩。

依個餅仔，酥而不膩，最重要，可以食到好天然嘅麵粉香味添啊。。。。

加埋炒到香香嘅肉餡，難怪強哥食到停唔到口~~

我問強哥，如果我開舖頭，依款酥餅做為產品一之，會唔會有人接受咧，強哥即刻俾佐好肯定嘅態度俾我，佢相信咁好味嘅餅仔，出邊嘅人一定都會欣賞~~

一個豐富又美味嘅早餐，食得好滿足好滿足~~~