泰式酸辣鳳爪（食譜）

天氣熱，人無乜胃口食飯，所以就諗住整啲酸咪咪開胃嘅食物食下，咁就整佐味酸辣鳳爪~~

先睇下醃料：

「荽莤、青瓜薄片、洋蔥、青檸、指頭椒、蒜蓉」

我做一磅嘅鳳爪，所以配料嘅份量唔洗太多，適量即可，如果一次製作量大，需增加配菜嘅份量。

做法：

1、鳳爪一磅，落水煮四五分鐘，水入邊擺一塊薑同少少酒

2、撈起鳳爪，係水喉下衝一衝走油脂，然後浸入冰水度，浸半個鐘左右。（用煮好嘅水去浸，咁唔洗驚有菌）

3、將配料撈埋一起，倒半支白醋入去，落砂糖，魚露調味。

份量要自己一邊落一邊試味，因為口味因人而異，無一個實際定量。

4、最後將浸好冰嘅鳳爪撈起濾去水份，倒入上個步驟攪好嘅醋汁入邊，浸住一晚以上入味。

自己整嘅鳳爪因為無用特殊嘢拉過，所以係唔會好似出邊街食嘅咁白。

浸佐一晚，搞掂~~~

就咁簡單~~

因為醋汁入邊有佐洋蔥荽莤青瓜等物嘅味道，滲佐入鳳爪度，食起上嚟，有一股好舒服嘅清香味~~~~

雞皮係醋度浸佐一晚，凍到冰一冰，食起上嚟，又爽又脆，簡直係夏季最一流嘅享受啊~~

無乜胃口食飯，所以只是簡單的煎佐兩個滑蛋，煎佐少少麻油香腸~~

煮多一碗麵，搞掂~~~

食完面，慢慢圇雞腳~~~