菜脯煎蛋、蒜蓉炒勝瓜

夏季食勝瓜真係好舒服嘅一件事。

清清哋，甜甜哋，又易煮，所以依日，用蒜蓉同少少餐肉，炒埋一碟。

通常勝瓜皮我都會完全去哂，因為好驚食到又苦又硬嘅外皮，因為無佐皮嘅支撐，勝瓜熟佐後好易縮到細細一舊，所以切勝瓜，我就會用滾刀切，切大稍大舊些，咁食起上嚟又有口感又好味啦。。。。

煎菜脯蛋。送粥送飯都好好嘅一味餸。

我會先將菜脯浸一浸水，等佢無咁咸，然後剁碎。

落鑊先用少油炒出香味。

然後打三個蛋，將炒香嘅菜脯倒入撈勻。

我發覺佐，煎蛋如果有「易潔鑊」同「鐵鑊」比，用易潔鑊煎出嚟嘅蛋，真係完全無果種香脆嘅味道同感覺，上次整涼瓜煎蛋，之所以味道同阿媽整嘅爭咁遠，後嚟我諗到個原因，就係鑊度，所以依次菜脯煎蛋，我就棄用易潔鑊，而係用好易痴底嘅生鐵鑊去煎，其實只要掌握到個技巧，生鐵鑊都可以完全唔痴底㗎。

首先個鑊一定要燒到好熱，然後倒少少油落去，熱鑊凍油之際，倒入蛋液入去，最短時間將蛋液煎熟定型，咁個蛋液就會離鑊而唔會痴住佢啦。

第一層嘅蛋唔痴底，跟住落嚟再煎幾多次蛋，都一定唔會痴底啦。。。

睇下，煎得個蛋香噴噴，脆卜卜，因為時間短，所以蛋係外層脆，內里嫩㗎，而且，用鐵鑊煎出嚟嘅蛋，真係香噴噴啊。。。

自覺好成功好好味嘅一碟「菜脯炒蛋」~~~