今日早餐好簡單，烚幾個蛋，煮碗麥皮，衝杯咖啡搞掂。
我覺得麥皮煮一煮過嘅，會好味過即衝果款，可以食到大大粒麥皮，咬起有卜卜脆嘅口感，滑過即衝嘅好多。。。
白烚蛋，強哥係「蛋王」，點煮啲蛋佢都好到不得了。
我就咁齋食蛋係唔慣嘅，以前鐘意點少少生抽加辣醬，後嚟發覺用芥末加生抽去點蛋食，味道非常之格，芥末加生抽，除佐食壽司，其實沾叮叮點心都一樣好好味，下次大家可以試下~~
尋日係街市買佐半磅蘑菇，都係五蚊雞，愛嚟滾個湯最清甜。
我鐘意買比較幼嘅菇菇，口感上會嫩滑好多，其實好多菇都係咁，譬如雞腿菇，好多人鐘意買大大隻嘅，其實細條啲嘅雞腿菇會嫩過大隻果啲，食起上嚟會滑好多㗎，大大隻嘅係太成熟啦，食起上嚟纖維會多啲，愛嚟炒的話，買細隻啲嘅會好味啲。
如果燜嘅咧，就要買大隻啲嘅好。（雞腿菇所指）
講返下圖依隻菇，街市最常見嘅一種菇類之一，愛嚟炒或者滾湯都好清甜，不過佢本身「性寒」，如果身體寒氣重嘅人，滾依味湯之前，可以先用滾水灼幾秒啲菇菇，咁啲寒氣就會減少好多啦。
不過灼過嘅菇菇始終無咁鮮甜，為佐平衡佢嘅寒氣，滾依味湯，我會落幾片薑~~~
滾湯係咁簡單啦，啲材料係咁掉入去煮滾，加鹽俾味就搞掂~~
我加佐少少免治豬肉等啖湯味道豐富啲，煮好嘅湯，再掉少少蔥段入去，會香好多㗎。。。。
一款有著天然清甜嘅滾湯，煮好啦~~~
買佐盒肥牛，加埋青椒炒起一大碟。。。
加佐三條杭椒，辣辣啲，好惹味~~~
蒸碟飯，滾個湯，炒個餸~~~
有幾難~~~
有無睇到總有兩杯酒~~
尋晚食飯之前，強哥突然話想飲甜米酒~~
依隻米酒，味道甜甜哋，酒精度數低，純糯米制成，我娘親自己親手釀造，絕無添加劑，本嚟凈係我一個人飲，耐唔耐叫阿媽整幾樽嚟俾我都夠飲嘅，不過如果加埋強哥都好埋，睇嚟我都要同阿娘學整，以後自給自足先得啦。。。。
平時擺係雪櫃，方便我係廚房切菜煮餸嘅時候，悶悶哋嘅時候，會倒一杯仔出嚟，自己嗲下嗲下，可以一邊聽住收音機，一邊飲啖酒，煮餸都好鬼開心㗎~~~
無拉拉強哥突然鐘意埋~~~~
咁就一人一杯仔，飯前你一啖我一啖，好開心㗎。。。。
沒有留言:
張貼留言