住家餸---瑤柱冬瓜湯+孜然肥牛炒薯仔

自細就要阿媽逼住先會飲幾啖湯水，習慣直到依家都無改過。對湯水係可有可無，成日都唔記得煲啖湯水俾老公飲添，尋日突然良心發現，咁就煲佐一個最簡單嘅湯水俾老公。

「瑤柱數粒、意米一碗仔、杞子數粒、薑二片、冬瓜一大舊、豬骨一斤、水一煲」

豬骨飛水後所有材料掉哂入煲係咁煲。。。。

可能太耐無飲過冬瓜湯，咦，覺得飲湯都幾舒服啊。。。

 

屋企凈有一個薯仔，半個洋蔥，一截甘筍。

咁就係樓下買佐盒肥牛，配搭住炒味餸啦。

以前食過用孜然炒羊肉嘅餸，同強哥都好鐘意，咁無羊肉買到，就將羊轉成肥牛代替啦。

做法：

1，肥牛用「生抽、老抽、糖、酒、孜然粉、辣椒粉、生粉」醃一個鐘入味

2，凈鑊落油先爆香洋蔥，然後倒入甘筍同薯仔略炒，落少少水燜熟，俾少少雞粉調味，然後盛起備用。

3，原鑊倒入肥牛猛火快炒至熟。

4，將炒熟嘅配料全部倒入，同肥牛炒勻，熄火，撒入一大扎荽莤，同一大匙孜然粉，用餘溫將味道焗出嚟，裝碟~~~

（荽莤同孜然一定要熄火後再落，因為太熱啲香味就揮發減弱）

無乜點落過油，因為肥牛本身會出好多油，再落就會覺得好肥啦。

肥牛加埋孜然，洋蔥同荽莤嘅香味，混雜之後，有一股莫名的吸引力，非常美妙~~~

極惹味極好餸飯嘅一味餸菜~~~

一個飯一碗湯一碟餸，一個晚餐~~~

 

屋企每日消耗最多嘅係生果，食生果多好啊，第二日去廁所都暢快啲，咁皮膚都會靚好多㗎。。。