又過年啦，又有蘿蔔糕，糯米飯食啦~~~
咁又點可以少得強嫂超味自家制嘅「XO醬」咧`~~
好彩尋晚得強哥提醒「今年未整過XO醬喎」
係喎，爭點唔記得添，所以尋晚即刻浸佐幾粒超大粒瑤柱，今日發好都有一大碗仔㗎~~~~
XO醬嘅主要材料如下圖所示~~~
同埋屋企凈有少半舊嘅臘肉，極肥~~
唔好嘥佐佢，切肥膏出嚟，加埋入去，增加甘香味~~
好啦，做法嚟啦！~~~
1，先將肥膏落鑊，慢火將油逼出嚟
（無嘅話，直接落油，咩油都可以，如果有豬油當然最香，普通花生油，芥花籽油，橄欖油都無妨）
2，將乾蔥倒入去，炸出香味。
有啲食譜話要炸成金黃色，但係如果唔識得掌握，好易金黃變炭黑，食落口變苦味，所以我就會中細火炸得三四分鐘，然後轉細火，倒入薑蒜蓉香茅，再炸二三分鐘~~~
3，待乾蔥、薑蒜蓉、香茅炸出好香口嘅香味嘅時候，可以將其餘瑤柱絲、蝦米、雲腿等倒入去炒出香味。
有啲食譜就會落超多油去炸所有材料，其實計我話，唔洗咁誇嘅，稍多少少嘅油，去炒出香味，都一樣嘅~~~
炸有一個唔好，佢會令到瑤柱蝦米依類食材變得好硬身，咁食落口點好食啊，咬到牙都痛埋㗎~~~
同埋乾蔥、薑蒜蓉、香茅依幾樣香料，我唔會話炸到好硬身果啲，我會保留返香口之餘，有少少本身嘅香味，咁先帶到香味出嚟。
4，落調味，我落佐「靚蠔油、超辣自制辣醬（係要俾個醬有辣味，所以加辣醬或者指天椒切料都無妨）、沙茶醬一大匙，豉油少少，糖）
要自己試味啦，我鐘意又辣又香又帶咸甜味，所以辣醬同糖蠔油都落得幾重手下~~~
沙茶醬我會用潮洲本地出嘅，不過如果無，唔落都無問題，我只不過係想佢香啲，因為沙茶醬都係蝦依類嘅嘢經發酵整出嚟嘅，有就香啲，無都唔緊要（隻沙茶醬係朋友響潮洲買返送俾我，香港無得買，好香㗎，香港嘅沙茶醬試佐好多隻，味道都差強人意~~）
5，將浸瑤柱凈低嘅水倒入去，開中大火煮至收汁。（依個時候，香味就完全散發出嚟啦）
係要有少少水咁煮，個醬先至唔會係全部都係油炸咁硬身㗎，同埋用水先將可以將所有味道更好帶出嚟再融合埋一起~~~
6，熄細火後倒入超市買嘅「炸蒜粒」，撈勻。
咁做係想個醬再香啲，落唔落都無影響嘅~~~~
7，再開下大火。炒幾炒，再香啲~~~
咁強嫂嘅XO醬，就大功告成啦`~~~
網上關於XO醬嘅食譜有好多，無話邊啲最正宗，自己多嘗試幾次，整出適合自己屋企人口味嘅就最OK~~
我係整佐幾次之後，發現如依篇文章所記錄嘅做法同配料，整出嚟嘅味道與口感係最掂嘅，所以先再詳細寫出嚟，俾大家參考下`~~~
入埋樽，都有一大樽啦~~~
有排食啦~~~~
出邊買，兩舊水都未必有咁正添㗎~~~~
自己整，話咁易啦~~~
係切材料，辛苦少少~~~
今日晨早九點幾鐘就起身開始切材料，切佐我成個幾鐘咁滯，頸都硬埋~~
由準備材料到煮好，十一點半，用佐兩個鐘左右先至搞掂，個肚仔即刻打起鼓仔同我揮揮手~~~咁炒好醬嘅鑊有好多油同埋好香嘅醬汁㗎，食得無嘥嘛~~~
好彩尋晚凈有碗飯，咁就切幾塊臘腸，炒埋個XO醬炒舊飯~~~~
正~~~~
可能肚餓呱，覺得「勁好味」~~~~
沒有留言:
張貼留言