蒸臘味飯

又蒸飯啦。。。。

其實蒸飯真係快靚正，蒸出嚟嘅飯我覺得口感總好過飯煲添~~~

而且蒸飯嘅工具好隨意，好似尋晚咁，我就用佐一個煎Pan嚟蒸，都絕無問題㗎。

蒸飯用嘅水，同飯煲用嘅水都係差唔多嘅量，如果初初蒸唔識得落水嘅份量，可以用個電飯煲嘅膽去裝米同埋入水，然後再倒番入碟度，記住個水量，下次就落同樣比例嘅水米就OK啦。

尋晚懶，蒸臘味全蒸~~~~

通常我都會係蒸佐大約十分鐘之後個飯開始收水，先至擺啲材料入去㗎，做法同煲仔飯大同小異，只不過蒸飯比煲仔飯，更易控制火候添~~~

用個煎pan嚟蒸飯係絕無問題㗎~~~

總可以睇住個蒸嘅過程，幾好玩啊~~~

臘味最好嘢嘅地方係佢嘅油脂會滲佐入飯內邊，咁食起啖飯，真係好甘香一流~~~

淋上甜豉油，加埋一碗仔泡菜，咁就一餐啦，幾簡單~~~

咁蒸好飯嘅水，其實好乾淨㗎，用得無嘥，我會再開返細細火，去碌一碌刀具，因為我無生熟刀分開用，切生嘢都係同一把刀，所以通常切過生嘢之後，我都會用滾水碌下把刀以做消毒之用。

咁蒸好飯嘅水，又乾淨又夠熱，殺死啲菌就一流啦。。。。

先消毒啲刀具，然後輪到廚房嘅抹佈，都煮一煮佢啦~~~

其實廚房用嘅抹佈，應該都好污糟下㗎，所以時不時都要高溫殺下菌，先至衛生嘛~~~~

咁樣煮一煮塊抹佈，又無化學嘢，又絕對能夠將油脂煮出嚟，又能夠殺菌消毒，一舉多得~~~

而個煎pan，係不銹鋼，好易洗乾淨，而且平日好少用嚟煮食，所以無乜油脂，最適宜愛嚟消毒廚房用品啦`~~

我平時用開嘅嘢，就算用到爛要掉嘅時候，通常都能夠保持得乾乾淨淨㗎~~~

係咪有少少潔癖傾向咧？

不過好彩我都唔算一個好執著嘅人~~~~