啤酒.白飯.枝竹羊腩煲（食譜）

天氣預報其實對生活都起到幾大作用。

知道周日將會落雨，所以提早一日買定材料，星期日可以安座家中，得享美食。

無需頂住風雨一身狼狽外出購買材料先至可以煮得餐飯。

周日都想儘量屋企人能夠食得開心啲，天氣又濕又涼，最適宜開住電爐，嘆罐啤酒，慢慢享用暖笠笠嘅煲仔~~~

所以，整佐一煲「枝竹羊腩煲」

當然要選用新鮮帶皮嘅羊腩，先至一流~~~

食譜係由奶奶度傳俾我嘅，以前想食都係返奶奶度食，不過都希望自己能夠泡制出嚟，主動權係自己度，咁幾時想食，就隨時可以整啦。

睇下，所有材料就咁多。

「羊腩二斤出水過凍水、油炸枝竹包半、南乳三磚、提子乾一細碗仔，冰糖細細粒幾粒、大量薑同蒜頭」

 

南乳大塊的話，二舊就夠，我嘅中等大細，我就落佐三舊，薑切厚身，多啲都唔怕，（我屋企原來凈返薑好少，所以落得少佐啲）蒜適量，冰糖少少就得，提子乾一碗仔，落提子乾係奶奶從老一輩人果度傳落嚟嘅作法，除佐可以好有效地避除羊膻味，額外可增加甜味同提子嘅香味，可能唔係好多人會落提子乾，不過落佐真係香好多㗎，奶奶總會落大量馬蹄，我無買到，所以無落。（不過我發覺唔落馬蹄對味道嘅影響都唔係好大）

唔需要額外俾鹽，因為南乳已有咸味，同埋我會落豉油俾色，材料煲好佐會有少少偏甜，不過就係要佢有少少甜味，配搭住最後食嘅時候點嘅腐乳，味道剛剛好，所以不需要額外再俾咸味。

 

做法：

因為我會先用快速煲燜煮，所以直接就係快速煲果度煎香配料。

1，先落少少油，爆香薑同蒜頭。（我係唔知屋企原來薑無佐幾多，所以落得較少，如果唔係，薑落多啲都唔怕㗎）

 

2，落少少油，將南乳倒入壓蓉，細火炒出香味。

3，倒入羊腩（羊腩一早先出過水再過凍水，去一去油脂）拌炒，倒入少少生抽老抽，贊酒（我用佐客家黃酒，好香）

4，倒入提子同冰糖，加水燜煮。（我用快速煲，上氣後煲佐半個鐘）

 

5，枝竹不適宜久煮，所以我係羊腩煲得差唔多之後，轉過一個煎Pan度嘅時候先至加落去，再燜煮多二十分鐘左右就熄火焗住佢。

羊腩煲我覺得最好係腍軟之餘，保持少少嚼口，太腍會腍到無曬感覺，太硬又難以入口，所以我就控制煮嘅時間唔好太長，先用快速煲壓半個鐘，再用普通鑊煮二十分鐘，然後焗住佢一個鐘，食之前再開火煮多十分鐘，咁個口感，就最完美啦~~~

 

 

開住電爐，出邊的大風大雨增加食羊腩煲嘅氛圍，開罐啤酒，最後裝碗白飯，食啖惹味羊腩，寫意人生，當如是~~~

 

不過原來兩公婆係食唔完兩斤羊腩嘅，實在我食枝竹總多過肉，縮佐味道嘅枝竹，再點少少腐乳，真係好味到無法形容~~~

問老公個羊腩煲俾幾分，佢豎起大拇指

「一百分」~~~