強哥依排真係忙到連飯都唔得閒食啦。
連續幾晚都係開夜開到成十點幾先返到屋企，所以晚飯都變宵夜。其實太夜食飯對身體真係非常之唔好，我叫強哥自己係公司做嘢做到肚餓就落街叫個餐咁食下，佢係都唔制，係都要趕返屋企陪下個老婆，撐下台腳~~
尋晚又係開夜開到十點幾先返到屋企。
提早係屋企煲定啖湯等老公返嚟飲。
我都唔知有咩湯水比較潤啲，凈係識得煲普通嘅湯，尋晚就煲佐一個章魚蓮藕花生綠豆湯。
材料就係「章魚、豬骨、蓮藕、花生、綠豆」
章魚同豬骨都要先汆汆水，落綠豆係可以令啖湯好味之餘，有下火功效。
我自細就唔鐘意飲湯，蓮藕湯係其中唯一嘅例外。
全部材料掉入快速煲，煲佐四十五分鐘，再熄火焗多半個鐘，快速煲真係好好用㗎，我熄火半個鐘之後再開返個蓋，入邊原來總係度慢慢滾緊㗎，所以雖然係熄佐火，不過都係持續煲緊嘅狀態，夜晚老公返嚟，再開返火整返熱佢，啖湯總融啊``~
老公一飲，即刻俾佐十個「good」~~
另外炒佐一個餸。
材料：「洋蔥、雞扒、甘筍、脆肉瓜」
做法：
1、切扒切一舊舊，用「豉油糖生粉薑」醃入味
2、脆肉瓜同甘筍略略汆一汆水。
3、熱鑊落油，爆熟雞肉，（醃時落較多嘅水）所以煮嘅時候唔洗加水，就咁干煎至熟
4、倒入脆肉瓜同甘筍，加埋XO醬，俾少少蠔油，炒勻上碟。
我應試係炒雞肉之前就先爆香洋蔥，不過一時忘記佐洋蔥，咁後加就唔好味，所以索性唔落洋蔥啦，脆肉瓜同甘筍先飛過水，已大半熟，再炒一炒佢就全熟啦，唔好炒太耐，咁食嘅時候，就能夠保持佢哋嘅爽脆度。
雞係雪藏雞，無乜味道，脆肉瓜同甘筍本身亦都係好淡味，所以配以惹味自製嘅XO醬，帶少少辣意，成碟餸，變得好正~~~
一樣一啲，炒埋都大大一碟㗎~~
熱辣辣即炒即食，正~~~
全程開猛火嚟炒，食落好夠鑊氣~~~
依次買嘅蓮藕好粉，我唔鐘意，哈哈哈，我鐘意食好滑果啲蓮藕~~~
簡單地一個餸，一個湯~~~
沒有留言:
張貼留言