以前開年飯都會返奶奶度過，其中奶奶必整嘅一味「臘味糯米飯」，係強哥心目中無可替代嘅必食點心。
咁今年無食到奶奶整嘅，唯有老婆頂上，亦都泡制一味「愛心臘味糯米飯」俾佢食啦。
我同阿媽都係糯米怪嚟嘅，凡係糯米嘅嘢都超鐘意食，所以整糯米飯，我屋企絕對有絕招，包無失手。
跟住強嫂，實無走寶。
做法
1，先將糯米，提早一晚浸住水。
因為我係第二日早上整，所以提早一晚浸定水。如果係要晚上煮，咁就早上浸定佢。
我通常會先洗乾淨糯米再浸水。水嘅多寡，視乎糯米嘅量決定。只要保持浸過糯米頭就可以啦。
同埋糯米唔會食水，唔似米飯咁，煮好後會發大好多，糯米煮好後，唔會發大幾多㗎，所以用嘅量要稍多一些，我依次整少少，就用佐三杯嘅糯米。（煮飯嘅杯）
糯米飯，我都係蒸熟㗎。
睇下蒸糯米粉嘅工具。
一塊大蒸碟，一塊係吉之島十蚊店買嘅蒸布。
將蒸佈濕佐水之後，舖係蒸碟上面，底下打個結，因為我唔想蒸嘅時候，啲水跟住佈走上糯米度，變得糯米太濕。
2，然後，睇下，個底係好梳汽㗎，就咁將浸佐一晚嘅糯米，直接舖上個蒸碟度，千其唔好落鹽，因為落鹽蒸糯米，啲糯米會斷成一截截㗎，所以就咁，咩都唔洗落，連水都唔洗，就咁，大火蒸「七分鐘」
係啊，蒸七分鐘咋~~~~睇一睇時間，七分鐘之後，開個蓋~~~
3，糯米飯已熟到差不多啦，擺條臘腸入去，然後用手淋少少水係糯米上，大約淋佐一細細碗仔嘅水啦，然後再大火蒸多「八分鐘」，搞掂~~~~
如果鐘意食硬身啲嘅，依步落嘅水就少啲，鐘意腍身啲，可以落水多少少，可以攞少少試食下，試下軟硬程度㗎。
今年買嘅係「美X」嘅臘腸，覺得佢細又細條過人，味又唔夠香，以後都係買返「榮X」嘅好味啲。
當當當~~~
三個步驟，合計十五分鐘，糯米飯就蒸好啦~~~~
因為係愛嚟炒嘅，所以我無落得太多水，糯米都係粒粒分明，煙煙韌韌，好有咬口，而且用嘅係新鮮當兆出嘅泰國糯米，絕無舊米嘅臭味，食落非常之一流~~~
睇下，蒸好嘅糯米飯，粒粒分明，絕對唔會痴底㗎~~~
糯米飯蒸好，炒嘅過程就好簡單啦。
我準備嘅材料有「臘腸切粒粒、紅蔥頭切碎、叉燒粒粒、一大大匙足料XO醬、少少荽莤」
材料方面悉聽尊便，隨各人喜好，不過臘腸同瑤柱蝦米，可以俾到甘香嘅鮮味，最好不要免去。蔥頭就能夠增加好多香味，通常我都唔會少㗎~~~叉燒係咁巧屋企有，就加埋落去~~~
炒法：
1，先爆香乾蔥，爆到有少少焦黃，咁香味先至會出嚟
2，倒入臘腸同叉燒炒出油脂。
3，倒入糯米粉，倒入XO醬，落胡椒粉同少少生抽俾味。
炒勻即可~~~
絕不會遜色於街外所售，且自家制作，少油多料，正`~
再用XO醬煎多幾塊蘿蔔糕，奶奶整嘅。
今年奶奶買到嘅蘿蔔好甜，又足料，而且粉嘅配料剛剛好，咬落口感好實，又食到蘿蔔味，真係超級正~！~~~
咁樣一個臘味糯米飯加埋蘿蔔糕嘅早餐，成就佐強哥心目中過年應有嘅傳統與美味~~~
要滿足我最最最心愛男人些少嘅願望，何難之有~~~
沒有留言:
張貼留言