可能騙局

騙徒無處不在，騙局隨時發生，騙徒嘅最終目的不外乎「利益」

而唯一可以令騙徒得手嘅原因就係我啲嘅「貪念」

早幾日就開始陸續收到所謂「送貨」嘅短訊，一來我同依間公司無任何商業聯絡，二來依類公司嘅電話顯示又點會咁古怪，所以收到短訊之後唔洗一秒已自動將佢歸類為白撞。

亦都無再理會。

點知頭先真係有人打嚟電話

男：「你好，送電話嚟」

我：「你邊間公司」

男：「我電XXX公司㗎」

男：「請問準備好合約內嘅錢未咧」

我：「準備咩錢」（清楚，冷靜嘅聲音」

男：「合約內嘅錢」

我：「因咩事送電話」（聲音開始強硬）

男：開始遲疑，可能諗緊，依個人睇怕唔好落塔

男：你係咪XXX

我：唔知

男：對唔住，打錯佐

如果我聽到有人要送電話嚟俾我，我表現嘅態度係唔明白而又好慌張，進而好奇地問係咩型號電話，同埋我要俾所謂合約內嘅幾錢的話，可能騙徒就開始佢啲嘅方法，套取我嘅地址，然後進行下一步直接行騙手法。

係打錯電話，定係一個騙局，我不得而知，但係令人覺得擔心嘅係，騙徒由早幾日就開始佈定局，先發幾個短訊嚟，然後再用進一步打電話嚟嘅方法，若是社會經驗少，或者生起貪念者，或者真係有人會上當都未定。

因此將頭先嘅經過寫出嚟，俾大家一個提醒，其中可能存在的一個騙局。

 

我自己就親身經歷過幾次騙徒意圖向我行騙嘅事件，發現其中一個必然嘅現象，多數行騙者，為掩飾佢行騙過程中嘅心虛同膽怯，多數會用非常多嘅話語去同你喋喋不休無關緊要嘅其它事情。

所以無論是任何交易進行的過程中，如果發現對方眼神閃爍，講好多廢話嘅時候，我通常會提起十萬分精神，無實際把握嘅時候，通常索性少賺啲，取消交易，避免損失。