美味早餐---潽洱、牛肉、豬腸粉

尋日強哥上廠，深夜12點先返到屋企，今日俾佢瞓遲少少啦，咁我就準備一個稍稍豐富少少嘅早餐過佢食。

尋日係旺角街市買豬腸粉，四蚊有十條，好滑㗎。

今日早上就用佐五條，剪成細截，隔水蒸五六分鐘等佢熱返。

蒸腸粉嘅時候，整牛肉。

 

牛肉同薑絲係尋晚就切好擺住，今日早上再醃一醃佢五六分鐘左右，等腸粉蒸好，就落鑊煎返熟。

牛肉用佐「老抽鹽糖生粉麻油蠔油」嚟醃。

用嘅係牛展切片，又爽又香，炒好熄火之前加少少蠔油加強蠔油味，超香~~~

 

然後就將炒好熱辣辣嘅牛肉，拌入蒸返熱嘅豬腸粉度，再俾啲麻油同頭抽，搞掂~~~

前後都係十分鐘嘅時候，老公刷完牙出嚟，就用得食啦~~~

 

再倒杯熱辣辣潽洱伴食，滋味無窮~~~

一個豐富又簡單嘅早餐，給老公全日無窮嘅精力~~~

牛肉嘅香，配以腸粉嘅滑，味道，一流！

 

頭先順便幫魚仔換埋水~~

睇下，我個「光波爐」，成為魚仔嘅新屋，魚仔個個游得幾歡喜~~~

 

依家屋企有五條魚仔，五福臨門啊~~~

加佐個氣泵，魚仔舒服啲~~

養佐大半個月啦，啲魚仔越嚟越靚，生佐好多閃閃嘅魚鱗出嚟，肥佐又靚佐，日日睇住佢哋，真係幾開心㗎~~

 

各位嘅光波爐有日退休之後，個玻璃兜咁厚咁大，都無嘥佐佢啊~~~