大年初一之煎糕同拜年

今年除佐年三十晚係奶奶度食團年飯，初一到初四都無返過去啊，今年全程係去我依邊嘅親戚度拜年，所以奶奶果邊，就要辛苦其它幾個細佬同弟婦睇住個場啦。

我阿媽訂佐幾個客家阿婆自己整嘅年糕，過年俾我送去俾長輩嘅~~好傳統嘅做法啊~~~~

外邊係竹編嘅框，里邊再包住棕葉，倒粉漿入去，直接就咁上籠蒸，所以咁樣傳統做法整出嚟嘅年糕，除佐糯米同黑糖本身嘅味道，總有好香嘅一陣竹同棕葉嘅清香添~~~

 

有一底係阿媽留俾我食嘅，強哥係年糕怪嚟㗎，最愛係食年糕啦。

睇下，蒸得夠火候，而且用嘅係黑糖，比市售黃糖所制嘅，又再香好多㗎。。。。

不過今年嘅年糕講真，整得好失敗啊，佢落得粘米粉少定係點，個年糕好腍身，好難煎啊。。。。。

不過味道真係好香~~

 

煎年糕食啦~~~

先煎腍身個年糕~~

然後當然少不得有蛋啦。。。。

提早買定靚蛋，中國人真係聰明，咁樣有蛋汁嘅年糕，香之餘，年糕同年糕之間唔會痴埋，真係一舉兩得~~~

 

一擺入鑊，蛋嘅香味即刻走出嚟，正`~~

 

然後，再煎埋係印尼公司訂嘅印尼黃金糕~~~

棉蘭出㗎，我媽咪就係印尼棉蘭出世嘅囉~~

未識我之前，強哥都唔知有咁正嘅黃金糕，有一年春節我買佐一底返嚟，強哥一試下之，驚為天人`~~

當然啦，印尼本地整嘅黃金糕，用嘅椰汁係新鮮刨出嚟嘅椰漿，無添加劑，同香港酒樓食果啲，不可同日而語~~

準備好年糕同禮物，食飽飲，去舅父度拜年啦~~~

同奶奶果邊拜年時嘅「麻將聲聲」截然不同嘅係，我依邊親戚拜年，大家圍埋餐檯，食下點心同瓜子糖果，飲啖茶，座埋大家閒話家常，親戚多，講咩話嘅都有「潮洲話、客家話、閩南話、印尼國語」乜都齊，係廣東話講得最少，強哥座係度一句都聽唔到，哈哈哈。。。。。

 

~~~~~~~~~~~~~~~~~~~~~~~~~~~~~~~~~~~~~~~~~

同場加映，最搞笑爛襪。

原本凈係穿佐個大指公個位細細個口仔，我依個人無乜所謂嘅，穿咪由得佢穿，我照著㗎，已經係超厚褲襪，我諗住無咁易爛㗎嘛，點知行一轉街返嚟，一除鞋，嘩，又會爛到「拱」嘅樣喎，超型啊，哈哈哈，我同強哥話，不如我剪爛埋另一邊，咁睇落好齊整嘅一對爛襪，超通風啊~~~

不過轉個頭，強哥幫我掉佐佢啦，佢真係驚我會剪埋另一邊就咁著出街啊，哈哈哈，佢話「咁通風，天氣咁凍，睇住陣間凍出蘿蔔仔，就辛苦啦」~~~

 

蘿蔔腳？好多年未試過，試下都好喎，哈哈哈~~~~