開始幫強哥記錄佢嘅工程人生

強哥一家四兄弟，各有所長。

大佬即係強哥，做設計同埋工程統籌近二十年。

二佬做木工，俗稱「逗木佬」，近十年經驗

三佬做水電，係大公司做冷氣師傅，都有十幾年經驗

四佬做油漆，都有近十年經驗，手勢一流

 

初識強哥，知道佢屋企各人手藝之後，曾打趣咁話「你哋幾兄弟拍住上，都夠料自己開間裝修公司啦」

不過事實係，幾兄弟各自為政，各為其主，經過多年嘅行業洗禮，順理榮升師傅之位。

強哥絕對係一個長情同專注嘅人，由畢業後，跟係大佬後邊學習嘅青年人，成長為今日能夠獨當一面嘅中年人，都係任職於同一間裝修公司。

做佐咁多年嘢，經手嘅工程不計其數，其實各種類型嘅工程，係強哥本身一种資歷嘅積累，同時亦係佢自己「無形資產」嘅一种累積。

如果就咁做完就完，我覺得實在可惜，鑒於網絡嘅便利，我打算自此，將強哥經手嘅工程以圖文方式記錄落嚟，算係幫佢嘅「工程人生」，做一個更系統更直觀嘅收集同記錄。

好彩老公一向有將工程進度影下相記錄自己進度嘅習慣，所以，對強哥嘅工程記錄，就可以由依家進行中嘅依單Project 開始。