蘿蔔滾排骨湯、蘿蔔焗牛仔骨

我係鐘意聽下電台聲音嘅人嚟㗎。

晚上瞓覺之前會聽半個鐘嘅電台節目，早上較佐鬧鐘係自動開部收音機，隨住新聞嘅聲音慢慢伸下懶腰再起身~~

有時係廚房，聽下電台節目，一邊做家務，一邊聽下即時新聞，做起嘢上嚟無咁孤清之餘，都多佐晚上同老公睡前閒聊嘅話題。

依幾日真系熱到著短袖出街都無問題，不過聽到天氣預告，今晚稍夜之後，將開始轉為寒冷天氣，大家要做好保暖措施啊~~~

不過都好，天凍凍，著得暖一暖，應曬過節嘅氣氛啦~~~

~~~~~~~~~~

尋日去奶奶度，都無乜時間諗煮咩餸啦。

求其係超市買佐盒排骨，一扎荽莤，一條蘿蔔，加埋雪櫃凈低有嘅兩塊牛仔骨，同埋唔記得買咩送嘅一包醬汁，自由配搭去煮佐餐飯。

 

蘿蔔都幾大條，切佐一半，滾刀切塊，排骨汆汆水，加塊薑，加水，係咁易滾佐四十分鐘左右，一個簡單嘅滾湯~~~

有啖湯飲，有排骨食，有蘿蔔食，幾好~~

清清哋，好香蘿蔔味，煮好後加少少荽莤同胡椒粉，好味~~~

荽莤少少調劑下，唔好落得太多搶走蘿蔔嘅味道，胡椒同蘿蔔我覺得幾時都咁格，所以都會落少少~~~

一個快捷簡單嘅滾湯，搞掂~~~

 

另外半邊嘅蘿蔔切粗條，加埋牛仔骨，加埋成包醬汁，撈勻。

 

原本打算係入焗爐焗㗎，點知老公提早收工，佢返到屋企我都沒開始煮咧，如果用焗爐焗，起碼都要二十幾分鐘先焗好，為佐節省時間，都係用返中國人傳統嘅炒菜鑊，先煎熟牛仔骨，然後倒入蘿蔔，加少少水燜煮幾分鐘，搞掂~~~

 

煮餸始終唔好過份依賴包裝好嘅醬汁，唉，個味道，甜到，我都頂唔順，依款牛仔骨醬汁，下次都係「咪搞」~~~

浪費佐我一碟嘅牛仔骨~~~~

如果係我自己較，先煎一煎熟牛仔骨，炒個洋蔥，然後整個醬汁「老抽生抽黑糖白蘭地生粉一啲啲」倒入去焗一焗，味道都肯定香過依包咁嘅所謂「牛仔骨醬汁」

 

 

算啦，好又一餐，唔好又一餐，開飯~~~