大人細佬都鐘意---薑汁香煎肉片

強哥尋晚多嘢做，無返嚟食飯，晚飯自己一個人搞掂。

本嚟想碌個面算數，不過屋企有一舊豬扒，已經擺佐一日，想處理佐佢，唔好擺咁耐。

細個時唔鐘意食菜，凈係鐘意食肉，如果無乜餸，我就會扁起個嘴唔肯食飯，細個時太瘦，阿媽一直想盡辦法想我食多哋飯，咁遇著我唔肯食飯嘅時候，阿媽就會煎一碟細細仔嘅薑汁肉片俾我，多啲啲嘅肉汁愛嚟撈飯，咁阿媽就唔駛理我，我自己會搞掂一碗飯㗎啦。

尋晚自己一個人嘅晚餐，又整返依一味薑汁肉片俾自己。

做法：

先將薑磨成蓉，量嘅多寡隨肉片而定。

然后落「生抽、老抽、黑糖、酒、生粉」

撈勻成醃汁。

 

係街市買佐舊豬扒肉，本嚟係想煎香茅豬扒，不過老公唔返嚟食飯，咁就全部切薄片。

 

將切好嘅豬扒醃二十分鐘左右。

 

因為我得閒，就一塊塊擺入鑊煎一煎定形，因為肉片好薄，基本上兩邊煎成金黃色就已經熟佐。

煎好一塊擺入碟，再落一塊生嘅落去繼續煎~~

 

煎好肉片嘅鑊好多肉汁，唔好嘥佐佢，洗佐幾片椰菜，掉入去炒幾下，落少少幼鹽調味，搞掂~~~

 

肉片自己食一半，留返另一半第二日再加青椒落去炒埋，又可以一碟餸啦。

 

 

蒸埋一細碟仔飯，有肉有菜，一個人嘅晚餐都可以好豐富。。。

我鐘意香口啲，就咁香煎，如果鐘意有肉汁撈下飯，可以落少少水去煮個肉片，我覺得依款肉片好適合帶飯，煮多少少肉汁，第二日翻叮都依然好好味㗎~~~