細個時曾經好迷依隻世嘉嘅炸彈人，喜歡佢簡單嘅規則，清楚嘅畫面，而且每關都配以唔同嘅音樂，甚有特色。
直至依家都覺得依個係一個好有魅力嘅Game嚟嘅，早輪係網上搵返佢，裝佐世嘉嘅摸擬器係電腦之後，因为我屋企有PS2嘅手柄，去黄金买个PS2嘅电脑转换插，咁就可以係電腦上用手柄玩返依個Game啦。
其實我不嬲都好鐘意玩依類唔係好複雜，畫面較為簡單嘅遊戲，唔使用腦，一路一路過關斬將直至爆機，就最為開心。
類似嘅Game總有任天堂嘅Super Mario ，更是我多年一路追隨著佢，可以話係伴隨我長大嘅一款，由紅白機追到NDS，再到近年嘅Wii，更是無一錯過，07年11月剛推出就即買佐一隻返嚟。
早幾日老公在未知會嘅情況下，俾佐一個驚喜我，買佐最新推出嘅依款返嚟。。。。
超級開心！！！
試玩之下，真係勁趣致，大鼻仔多佐好多裝備，除佐識得飛之外，總有好似炸彈人有得騎龍仔一樣，依款大鼻仔，亦都有一隻龍仔可以騎添，勁搞笑。。。。
依排睇怕都無乜心機煮飯仔啦~~~
真係好多謝哥哥，錫返兩啖先。。。。啜啜啜~~~
-------------------------------------------------------------------
Game係要打，不過餸都要煮嘅。。。。
雪櫃原來有「三條」咁大把嘅椒係度喎。
不過無睇小佢三條友啊，睇下早幾日係惠X買嘅幾條有機乜椒，左邊係果三條友仔，右邊兩條二打綠幾咁纖細~~
相形之下，足可見到佢三隻嘢有幾咁大隻佬。。。。。
係上個月係深圳買返嚟嘅，貪得意，見佢咁大碌~~~
原來咁襟擺喎，無穿無爛，真好嘢~~
（咦，會唔會落佐防腐劑係面度咧？）
整一味「豉椒炒肉碎」
材料：青椒切段、免治豬肉較好味、蒜蓉、豉蓉（一粒粒陽江豆豉浸水之後洗凈再剁成蓉）
通常講到「豉椒」嘅時候，豉與椒都作為配角出現人前，為打破慣例，依次嘅「豉椒」，椒係做為主角展示人前，而豬肉退位讓賢，變成佢嘅一個小小陪襯。
做法：1，先用油爆到青椒表皮皺起，變為腍身。
2，倒走多餘嘅油，倒入蒜頭同豉蓉爆出香味。
3，倒入免治豬肉少少，炒散炒熟。
4，倒入步驟1嘅青椒落鑊，加少少豉油調味，搞掂~~
好惹味嘅一款餸菜。。。。
因為已經有一味惹味嘅餸，所以另一款我就以清淡為主。
尋日整嘅蘿蔔肉丸湯，為佐成全蘿蔔粒粒圓圓嘅身姿，唯有犧牲好多無辦法完成嘅蘿蔔邊邊角角，為免浪費，我將整完凈抵嘅蘿蔔邊角料留返出嚟。
第二日，將這許多的不規則，勉為其難地切成一粒粒去掩飾佢嘅不完整。
配以「免治豬肉、香菇切粒粒、薑片」
整返味清淡嘅餸菜。
做法：熱鑊落油，爆香薑片同香菇粒，倒入肉碎炒散，倒入蘿蔔粒粒略炒，倒入雞湯，落少少鹽同胡椒粉調味，轉入瓦煲仔焗十分鐘左右。
鮮甜美味嘅一煲剩餘物資~~~
豆卜、粉絲、大醬、見唔到嘅肉碎
做法：煲仔落水煮滾，落豆卜，落大醬二匙，煮至融味，落粉絲，熄火。
求其有啖湯飲~~
花費無幾嘅一個晚餐~~
沒有留言:
張貼留言