好多年前隻身前往內地極北之地游走，礙於囊中羞涩，多數會選擇最道地的本土食物，通常本土食物都係物美價廉。曾經一次，實在凍到四肢麻木之時，走入一間簡陋餐館，叫佐一大碗嘅「酸辣湯」，果碗冒著滾滾濃煙，一大海碗嘅熱湯，果種極酸極辣，刺激效果一流嘅湯水，我連飲兩大碗入肚之後，果一種滿足感，係即時係四肢百骸之間散開去，感覺賤命即時得救。果種滿足，基本上同食物本身嘅味道無關，而售價，不過人仔一十五蚊咋，係勁大一窩㗎。
強哥多年前係上海工作過一段時間，對酸辣湯亦係情有所鍾，所以數日前與強哥去了家上海小館食飯，睇到餐牌，即時點佐一窩「酸辣湯」。
不過飲過後實在大失所望。怕是為適應港人口味，就空有其酸，辣意欠奉。酸辣湯嘅辣意，應係來自胡椒粉嘅辛香味，而飲到嘅果窩，竟然係落佐少少辣椒，然後配以絕無辣意嘅紅油，造成一種視覺上嘅辣感，過厚嘅生粉勾芡，飲落實在似是一場災難，大失所望之餘，決定自己打造記憶中嘅味道。
所幸，出嚟嘅成品無論外觀或者就咁聞落嘅味道，已同記憶中嘅酸辣湯吻合。
同大家講下我嘅做法。
材料：豆腐切條、甘筍切絲、青椒切絲、木耳泡發切絲、少少冬筍切絲、香菇浸發切絲。
另外蛋一隻，免治豬肉適量。
作法：1，落高湯入鑊，倒入豆腐絲煮一煮
2，倒入免治豬肉，香菇絲，筍絲，甘筍絲，青椒絲，木耳絲煮開。
（落少少豉油較個咸味，同埋可增加色水靚啲）
3，準備一個碗仔，倒入陳醋，胡椒粉，生粉，溝均。
4，等所有材料煮熟之後，最後先至將依碗味水倒入去，因為醋久煮會減淡醋意，胡椒粉煮耐佐就無佐香辛味，所以依碗仔味水要最後先落。
酸辣度可因應個人口味調較，生粉我落佐兩大匙。
陳醋嘅選擇都比較緊要，劣質陳醋飲落會好「坑」喉，如果有機會選擇，可以留意標籤上註明嘅釀造時間。我會選用釀造三年或以上嘅陳醋，個味道更為醇厚，好順喉。
因為瓦煲仔保暖性較強嘅緣故，我會熄佐火之後先將蛋打落湯度，用煲仔嘅餘溫去焗熟D蛋，咁樣蛋食落就好嫩好滑。
自己整酸辣湯，掂過街食好多好多好多。。。。
豆腐算係食物當中含鈣量最多嘅一款，而且我好鐘意豆腐嘅味道，所以閒來無事，我都會用豆腐製作各式食物。
整酸辣湯要用到豆腐，但係用量不多，咁我就索性另一味餸都用埋豆腐整，咁買佐兩舊豆腐，足夠煮一個餸同整個湯嘅份量。
魚香茄子食過嘅人就好多，咁我就諗，用同樣嘅煮法，將茄子轉成豆腐試下。
所以就有佐依味「魚香豆腐煲」出嚟啦。
做法：1，用硬豆腐，切片之後，落油炸至表面酥脆。
2，然後準備所有材料「炸豆腐、甘筍絲、青椒絲、蒜蓉、咸魚剁蓉」
總有免治豬肉（我買餸前多數會有統籌過，所以買嘅材料係當日所有餸都適用嘅）
（甘筍同青椒絲係煮湯凈有嘅材料，用得唔好浪費，加埋到依個餸度，配下色都好。）
3，鑊落少少油，爆香料頭，炒半熟免治豬肉。
4，倒入豆腐，加水，加豉油糖較味，開火略煮，令個味道混合，然後打個芡水收汁，轉入瓦煲仔，開火再焗幾分鐘。
（因為要突出咸魚嘅香味，所以凈係用豉油較味，唔好用太重味嘅調味，少少豉油可增加豉香味，咁就唔會搶走咸魚嘅獨有香味）
可以好負責咁話俾大家知，咁樣整，係好惹味，好好送飯嘅。。。。
我一揭開個煲蓋，老公已「嘩」一聲
「好香」~~
魚香豆腐煲，絕對值得你一試~~
老公唔食筍，炒佐碟筍絲炒肉碎自己享用。。。。
咦，全部黃燦燦~~~
依一餐，係「黃金滿屋」餐`~~~
正~~
沒有留言:
張貼留言