廣東珠三角有好多廠家。
聽過一個關於設備嘅古仔。
有一間頗具規模的大廠，引進佐一套德國自動包裝嘅流水生產線，點知設備使用之後發現一個好大問題，依套設備，竟然經常性地會發生包裝唔到產品嘅錯誤，等到最後流程先至發現出佐幾個空盒，啲產品都裝唔到入去，咁依個絕對係一個好大的問題，陣間出佐廠俾客先至發現得個吉盒，咁點算咧~~
於是廠方就請佐一個機械方面嘅專家返嚟解決依個問題，專家聯手十幾人組成一個研究小組，不眠不休連續研究佐三個月，終於發明佐一個自動X光探測手臂，咁依個機械手臂，可以通過X光探測到包裝唔到產品嘅吉盒，然後自動將佢取走。。。。
問題終於解決，為此耗資數百萬。
而同一時間，另一間規模好細嘅廠家亦都買佐同一部設備，亦都發生佐同樣嘅一個問題，所不同嘅係，廠家無能力請專家解決問題，只是同QC 部嘅主管講佐一聲「俾你三日時間，幫我搞掂佢」
唔使三日，只不過一日，QC主管就搞掂佐。
「放把強力風扇係流水線嘅側邊，凡是入唔到產品嘅盒，經過風扇嘅時候，吉盒因為輕身，自動被風吹落地下」
問題迎刃而解，費用不過數百元。
有時將問題諗得太深，反而未必係一件好事。
---------------------------------------------------------------
尋晚又係好簡單嘅一餐。
切少少煙肉，拍幾粒蒜頭，三蚊芽菜，炒埋一碟~~
落少少面豉，無落鹽，惹味清甜~~
老公話想食燒鴨，買佐一舊鴨批位返嚟，到老公收工嘅時候，凍冰冰。
咁就切佐少少薑絲，拍少少蒜蓉，剁佐一粒咸檸檬。
先用少少少少油，爆香蒜頭與薑絲，倒入燒鴨兜炒，倒入燒鴨汁同包酸梅醬，少少生抽，熄細火，炒至乾身，起鑊之前倒入咸檸檬兜勻，搞掂~~
香噴噴，熱辣辣，酸咪咪~~
天凍凍飲啖湯水最舒服，就咁易用佐一細舊仔蘿蔔切粒粒，加清水煮滾，落之前整包凈返嘅肉餡，煲滾之後加入韓國面豉醬一大匙，熄火之後倒入荽莤~~
唔使太複雜，簡簡單單一餐，好好味~~~
沒有留言:
張貼留言