煎柿餅（圖解）

書房的一角。

養佐兩條魚仔，一條叫大肚腩，一條叫大眼泡。

雖然屋苑可以養寵物，不過唔確定自己有否足夠的責任心去愛護佢哋，所以唯有選擇較易打理嘅魚仔嚟安慰下自己。

以前養過一條又係依類普通之極嘅魚仔，一養近四年，最近壽終正寢，仙去了，所以又買返兩條細細條嘅嚟玩下，係金魚街買，五蚊條咋~

 

擺係電腦檯旁邊，得閒望下佢地，優哉游哉，不亦樂乎~~

養佐一樽仔綠葉植物，又係易打理嘅對像，耐唔耐換下水，唔惹蟲蟻又易打理，得閒望下少少綠綠啲嘅嘢，都幾舒服㗎，個玻璃樽係食完嘅食物凈返嘅樽仔，過於平凡，自己用普通嘅麻繩去繞一圈，睇落粗獷之餘，添多幾分味道~~

 

近排街市多佐好多柿賣，平靚正，好甜好香嘅腍柿，五蚊有七隻，比較細隻啲。

尋日買餸時順便又買多五蚊返嚟，不過因為拎嘢太多，返到嚟一睇，壓爛兩個。

爛成咁，食都食唔落口啦~~~

 

反正第二日嘅早餐未有著落，我依個慳家師奶，靈機一觸，想辦法變廢為寶。

咁就將壓爛佐嘅柿，小心清洗之後去皮，然後加入普通面粉，搓成一個面團。

無份量可計㗎，隨便咁加面粉，直至可以搓得成面團為之OK。

因為柿本身有足夠嘅水份同甜度，所以除佐面粉我其餘乜都無添加。

咁如果凈係面粉同柿味道未免過於單調，於是用少少豆沙餡搭配。

將豆沙餡包住入柿面團，包成一個圓收口之後壓扁。

 

跟住用油，煎至兩面金黃即可~~

 

睇下，兩隻細細隻嘅柿咋，煎成咁多個柿餅啦。。。。

 

趁新鮮熱辣辣，即食佐兩件，好味~~~

 

所以我不嬲都認為，生活唔一定需要刻意地昂貴與奢華去證實自己存在的價值，幾時最緊要嘅，都係自己內心嘅平靜與滿足最高貴。