尋日到佐黃昏時間真係開始凍到不得了。
咁凍嘅天氣，當然係用煲仔來載住啲食物最好，食到尾嘅餸都依然能夠保有餘溫。
阿媽鄉下係潮洲，所以我都算係半個潮洲人來㗎，潮洲話聽就識聽，講就麻麻。。。。
尋日整佐一煲潮洲家常菜，暖笠笠，香噴噴嘅「芥菜排骨煲」
做法：
1，肋排或腩排隨意，用「胡椒粉、生粉、雞粉、糖、油、豉油」
醃半個鐘或以上入味。
胡椒粉我落重手少少，因為我好鐘意排骨有胡椒嘅味道。
落少少豉油係等佢有少少豉香味同色水靚D。
2，然後排骨落鑊，放少少油，煎炸至表皮變金黃色。
買佐一蚊雞蔥，蔥頭好大個，所以我就切佐出嚟，依類蔥曬乾身之後就係平日我整鹵肉飯最愛落嘅「乾蔥」。
隻不過依個係新鮮嘅，不過炒香佐一樣好香口㗎。
芥菜我就用佐依類大葉嘅芥菜，甘甘啲得嚟，好甜㗎。。。。
每年到佐依個時候，阿媽就會買好多依款芥菜返嚟開始整咸酸菜啦。
我用佐兩大條依隻芥菜，切成大塊，已經有一盤仔啦。
最好就切大塊，因為做煲仔要燜稍長時間，大塊食起上嚟都總有見菜。
香料方面我就用佐「蔥頭切粒粒、蒜蓉、薑蓉」
用頭先煎完排骨嘅油，倒多餘嘅油出嚟，凈返少少油，用嚟炒芥菜。
3，先爆香料頭，然後倒入切成大塊嘅芥菜入去，炒軟身之後，落鹽，少少豉油，炒到個味均勻。
4，然後將炒好嘅芥菜裝入煲底，面上再舖埋排骨，開火燜煮十五分鐘左右，即可。
芥菜唔使再加水㗎啦，因為菜一加熱會自己出水，不過如果鐘意飲有少少湯汁，可以加少少水。
一煲香噴噴，暖笠笠嘅芥菜排骨煲，就搞掂啦，係未好易咧。。。
真係好好味㗎。。。。
底下嘅芥菜，我覺得總好味過排骨添`~
冬天嘅蘿蔔總是特別嘅清甜多汁，又特別平，尋日買佐一條蘿蔔，都係二個半銀紙咋。
簡單地愛嚟滾個蘿蔔湯。
因為係要整肉丸加落啖湯，咁肉丸係圓嘅，至於蘿蔔，我就將佢用一個專係整依類形狀嘅「嘢」去將蘿蔔挑成一個個「半圓」
我無力真係整到一個全圓，索性就整到半圓啦。。。
滾蘿蔔湯嘅做法：
1，煲里注入雞湯（我湯雞凈返一半，咁就摻佐少少清水，無雞湯其實就咁用清水都無問題），加幾片薑入去，倒入蘿蔔，煮滾。
2，免治豬肉用「胡椒粉、生粉、麻油、薑蓉、豉油」攪至起膠，待水滾之後，用整蘿蔔嘅果個「嘢」整成一個個肉丸，倒入湯度，等肉丸浮起，就熟佐啦，然後準備一個生粉開佐嘅芡水，倒入去，等啖湯飲落會滑好多㗎。。。
熄火之後，落少少鹽調味，落胡椒粉。。。。
睇下，好靚好清爽嘅一煲湯水就整好了。
加佐胡椒粉嘅蘿蔔湯，飲落真係暖到個胃好舒服。。。。
試下啦。。。
一湯一菜煲，暖笠笠嘅一餐，搞掂~~~
專登睇佐時間，由炸排骨到湯滾好，都唔使一個鐘就開得飯，算係好快手嘅一餐。。。。
好適合總要返工嘅朋友去煮哩一餐~~（排骨可以提早一日醃定都無問題㗎，咁收工返嚟就炸佢，或者索性可以提早炸好都得㗎）
沒有留言:
張貼留言