買佐一舊十二蚊嘅五花腩。
一舊仔咋。不過已經足夠一個晚餐所需。
湯，大醬湯。
做法：1，五花腩取三分一，切片。
2，用薑片蒜片落油爆香，然後倒腩片入去爆到肉色轉白。
3，落滾水，加一大匙韓國大醬同一匙韓國牛肉粉。（韓國人會落好多大醬，咁依隻湯配白飯已經係好正嘅湯飯嚟㗎啦，不過我係要飲湯所以凈係落一匙大醬要個味，唔要太咸。）
4，韓國人離不開嘅係豆腐同芽菜。
買佐二蚊雞芽菜，用一細扎，放落湯度。
5，落豆腐。豆腐直接用手撕成一舊舊擺落湯，咁就唔會有刀嘅鐵味，啖湯會好味好多㗎，同埋落多一大扎蔥落去，如果食得辣，落多少少辣椒落去。我就落多一匙辣椒醬。咁啖湯更惹味。
係咁煲得十幾分鐘，啖湯就OK啦。。。
一味好簡單易整嘅韓國大醬湯。
韓國古代人唔識得整瓦煲，唯有用石頭代替，咁中國人叻哋，有更先進嘅武器「瓦煲仔」~~
所以聰明嘅香港師奶，唔會另外購置石鍋，只用香港遍地可見嘅「瓦煲仔」煮依款大醬湯，同樣好好味㗎`~~
飯---拌飯
食過最貴嘅石鍋拌飯，係尖沙咀要接近三百蚊一鍋，食過最平嘅石鍋拌飯，係深圳一間東北菜館要價15蚊人仔。
印象中最好味嘅，唔係食到貴一貴裝修到靚一靚嘅果一鍋，反而係果間裝修簡單，卻風味突出嘅一鍋平價石鍋拌飯。
好可惜，因為當時都係隨機入去食飯，後來再去附近搵，搵極都搵唔到果一間餐館係邊一間。
後來無數次去不同嘅韓國餐廳食飯，都必定會要一鍋石鍋拌飯，喜歡佢熱辣辣，香噴噴，俾到我好滿足嘅感覺。
依日又係屋企整拌飯。
材料做法：
五花腩三分二，切細粒，用豉油糖大醬醃好味道。
然后擺入鐵鑊，細火干燒，最后加少少水焗至熟。
一碗仔醬味實足嘅醬肉就整好啦。
配菜方面，再加埋「青瓜絲、甘筍絲、泡菜絲、芽菜灼熟」
泡菜都係自家制㗎，唔使錢，其它配菜，都係一二蚊嘅事。
整拌飯，好平姐。。。。
睇下，一餐飯，好多碗碗煲煲。。。。
無石鍋，懶得用瓦煲再燒再點，直接電飯煲，擺曬材料。。。
醬方面，我落佐大醬同一種專拌飯用嘅辣醬。。。
就係依隻醬料啦，一般韓國食品店都可以買到。
打多一個雞蛋落去。趁飯熱，所有材料撈勻。。。
撈嘅時候，繼續飯煲開住火，咁煲飯就KEEP住熱辣辣，當然，同用石鍋咁煲暖嘅容器相比，係差D㗎啦，不過勝在味道夠搶，依煲改良版嘅拌飯，都好好味㗎。。。。
始終係慣佐要飲D凍飲。。。。
阿娘自己醃嘅咸檸檬，加埋一罐七喜。。。。
有飯有湯有凍飲，咁先至叫完美嘅晚餐嘛。。。。
沒有留言:
張貼留言