晏畫多數無乜胃口同時間慢慢食，所以我都會準備簡單易入口嘅食物俾老公食，食完佢可以休息下先至行返公司繼續博殺。
依日中午，就提早少少碌定兩塊肥牛，煎多隻蛋。
等老公返到嚟屋企，我先至碌個面，佢就可以座陣飲啖水，等多兩三分鐘，開得餐`~
晚餐
肥牛我唔鐘意就咁醃味直接煎，咁直接煎會出勁多油，食起上嚟成口都係油，好流。所以我會先拖一拖水，走一走表面嘅油脂，又唔好碌得太熟，有四五成熟就得。
再準備多一個燒肉醬同大醬，少少洋蔥。
用依隻燒肉醬，可惜我上次買得少佐D，一包都係最多用二次就用完，佢好細一包咋，唔知尖沙咀賣韓國食物果度有無得依隻醬汁買咧？下次要走去望下。。。
炒就勁簡單，先落油爆香洋蔥，然後倒入醬汁炒出味道，最後倒入肥牛兜熟兜勻味道，食得~~~
天口熱，無乜胃口，就整佐一個拍黃瓜~~
一碟熱餸一個冷盤，剛剛好~~
煲佐一大煲海帶綠豆沙，下火~~~
-----------------------------------------------------------
大樹菠蘿係我超鐘意食嘅一款生果，唔知大家會唔會好似我咁，食得好徹底咧？
我係徹底到，連個核都食埋啊。。。
係啊，如果你平日食完個大樹菠蘿，D核就咁隨手掉佐嘅話，咁你就真係走寶啦。。。係絕對走寶！
無論係玩定係食，都要盡興。
所以一次過，食佐好多大樹菠蘿~~~
咁就產生佐好核。。。咁D核，用少少生粉，洗干凈上邊果層滑滑嘅嘢，然後，煲定煲水，落少少鹽，好似烚栗子咁，將大樹菠蘿核掉入去，煮十幾二十分鐘。。。。
煮熟佐嘅果核，外層嘅硬皮會爆裂開，露出入邊凝脂一般嘅雪肌~~~
美艷不可方物~~
自細阿媽買大樹菠蘿，比食果肉更期待嘅，往往係食完之後再煮嘅果個核。。。。
個口感綿綿沙沙，食落有種果仁獨特嘅清香，非筆墨能夠形容，勢必要親身體驗先至能夠感受個中滋味~~~
有機會，你都試下啦~~
沒有留言:
張貼留言