奶奶有份Form一定要第二日交俾相關部門，咁佢自己又唔識得字，屋企又無人，無奈下即刻俾電話我，想我過去幫佢搞掂。
咁我又買佐餸，就建議奶奶，不如過嚟我度，順便食埋晚飯，我幫佢填好，佢先至返去。一舉兩得啦。
奶奶聽到梗開心㗎，即刻話「阿媽食好少咋，求其有魚有菜得啦」
啊？~·！￥有魚有菜。。。我同強哥都麻麻鐘意食魚，所以邊有準備魚啊，咁即刻又落樓去，買佐條返嚟。
清蒸最簡單。。。。
可能同平日奶奶蒸魚用普通鋼碟唔同，我用佐一個較為精致嘅碟嚟蒸，蒸好一羅出嚟，奶奶一望到，即刻「嘩..蒸得好靚啊,合格合格」
奶奶鐘意食肥叉，經過燒味舖，見到叉燒幾靚，又斬多一條，食唔曬我第二日可以碌面再食，唔怕多。。。
再加埋一個我本來就準備定，預佐晚餐食嘅豆卜蒸排骨。
排骨用李X記果隻蒜蓉豆豉醬，落少少油，落幾湯匙水，再加少少薑蓉醃好味，然後豆卜買佐二蚊雞，一開三，舖底。
將醃好嘅排骨擺係豆卜上邊。
然後上鑊蒸十五分鐘。。。。
整咁樣一味蒸餸，真係方便快速又美味㗎。。。。
其實最好食係縮佐排骨醬汁嘅豆卜，排骨我反而食好少，豆卜幾乎我全包~~~
再滾多一個芥菜肉丸湯，剛好我果日整肉包，凈有D肉餡，就搓成一粒粒肉丸滾湯，飯後又裝佐兩個大大肉包俾奶奶帶返去第二日早餐。
奶奶開心到猛咁話「今日真係有食神」
呵，睇到老人家咁開心，自己都覺得好開心。
基本上奶奶已經習慣我逢餸必影，所以我一邊影相，佢一邊話「係啦，今餐叻叻，煮俾奶奶食，奶奶過嚟，整佐好多餸啊，奶奶好開心」
哈哈哈，佢一邊幫我配音添。。。。
飯後切多碟生果，搞掂~~
沒有留言:
張貼留言