一日兩餐之--生煎韭菜包、韭菜碎碎炒

 

依日無端端極想食韭菜生煎包。

早上同老公食佐早餐之後即刻發面，搓好面等佢自己發酵，我就去街市買餸，買好餸返嚟，切切剁剁炒炒，先搞掂個餡先。

個韭菜餡我用佐「韭菜、免治豬肉、蝦米、蛋」

 

其實量用得好少，豬肉都係用佐一大湯匙，雞蛋一隻，蝦米七八粒，韭菜一蚊到。

將所有材料分別炒香，然後混合埋一起，再加鹽同五香粉調味，咁個餡就整好啦。

 

時間比較緊，我買好餸返嚟都就嚟十二點羅，整得餡嚟，要趕得及俾一點收工返嚟嘅老公食，咁餡又要剁又要洗又要炒，個包皮又未整好，真係幾趕㗎，咁我一邊整一邊同自己講「我做到㗎，一定趕得及」

其實我覺得一個師奶真係可以係一個好好嘅管理者，因為要係最短嘅時間安排好所有功夫，真係要好合理地安排所有工作的程序同步驟，咁先至可以用最短嘅時間發揮到最高嘅效率，先至可以將工夫完成得最完美。

哈。。。又真係幾好嘢啊，個餡嘅份量同面團配合得剛剛好，所有面團剛好用完所有餡。

因為時間唔多夠，一邊包一邊由得佢第二次發酵咁羅。

一包好，無乜時間等啦，直接上鑊煎啦。

好才，都發得好好。。。。

係最後包好，完全無時間進行第二次發酵嘅果一二隻，有少少無咁鬆軟，大部份都發得好靚。。。

睇下，最好味嘅，係煎好之後底果一層香口嘅薄脆。。。。

 

韭菜生煎包，我就覺得比全肉餡包更好美啦。。。

而且多食韭菜，對於脾胃都有極好嘅正面的食療作用。

關於生煎包，我上一次有詳細寫過煎法，有興趣可以去參考下：

http://hk.myblog.yahoo.com/jw!teGGuySUFR5nKYeo9kMK3A--/article?mid=3966&fid=-1&action=next

趁個包係度煎嘅空檔時間，整佐一煲芫荽豆腐湯。

依日嘅晏畫，就一個包，一個湯。。。。

 

------------------------------------------------------------------

到佐夜晚，就用剩低果D韭菜剁碎碎，因為少佐D，咁就加佐甘筍同肉碎落去一起炒，原來簡單地配搭，係咁惹味，咁易送飯啵。。。

再加埋一條脆肉瓜，同肉碎一起炒埋一碟。。。

清清爽爽嘅一個晚餐，就咁搞掂~~