一碗香菇鹵肉飯

早排新買佐一個Game，依輪係咁日夜不分地練功，直至尋日終於爆機，咁先至得閒上嚟睇下個Blog。。。。

依排再不聞世事，亦都通過新聞得知台灣發生緊乜嘢事，睇到類似新聞，都會拉住個心，好唔舒服，唯有為台灣所有災難當中嘅所有朋友禱福，希望佢地可以早早跨過依個大難關，而自己可以做嘅，就係俾少少心意，權當出佐少少綿力，希望所有有能力嘅朋友，幫得幾多，就幫幾多啦。。。

-------------------------------------------------------

補返一個很耐之前整過嘅一款台灣鹵肉飯。

樓下有間食台灣嘢嘅餐廳，試過一次佢哋嘅鹵肉飯，就再無第二次幫襯。

想食到美味食物，求人不如靠自己。

材料：

1，五花腩一條烚熟之後切幼條，一定要帶皮。

2，紅蔥頭切片，蒜頭切片

3，蝦米浸軟之後切粒粒

4，香菇切條

 

做法

1，條五花腩一邊較肥，將D肥膏切落嚟先用鑊炸，煎到D油出黎，然後將油渣撈起，咁就唔使額外落油啦，直接原鑊倒入蔥頭同蒜用油炸到金黃色，倒入蝦米炒香，倒入五花腩同香菇炒香香。

 

2，落老抽生抽糖五香粉一細匙，一粒八角，炒上色水。

 

3，轉入瓦煲仔，開火焗半個鐘或以上。

 

一定要帶皮嘅五花腩，用手切，咁食起上嚟口感先至最正，好多餐廳都識得落八角五香粉蔥頭依類必要嘅食材，但係就忽略佐蝦米依樣嘢，落佐蝦米嘅成煲嘢，味道完全變得更加出色非凡~~

 

再灼多碟生菜，搞掂一個晚餐啦。。。

 

勁好送飯嘅鹵肉飯。。。。。

我嘅至愛。。。。

 

五花腩連皮一起煲，咁皮入邊嘅膠質會滲入到成整嘢入邊，食起上嚟會感覺更滑更好味，所以，帶皮嘅五花腩，係絕對必要嘅~~~

一碗正過街外嘅手切香菇鹵肉飯。。。。。