尋日同老公去牛頭角影完一輪相之后返官塘奶奶度食飯。
公眾假期，個個得閒都返去奶奶度食飯，係除佐二佬，二佬個女朋友唔知點解好唔鐘意返黎食飯，變到二佬都無得返黎，四兄弟永遠四缺一。連父親節都唔出黎一起食餐飯，我就覺得真係有少少離譜。
阿四叔個老婆就好乖好識大體，過時過節都會返黎一起食下飯打下麻將，好彩有佢兩個頂住檔同老爺奶奶打牌，如果唔係真係幾悶下，因為我同強哥兩個人都唔多識得打牌，寧可打機總好。
知我地個個會返去食飯，老爺從漁排帶佐D蟹返黎。
三隻大大隻，怕有三斤幾四斤重，幾巨型。。。。
出邊買起碼都舊幾水走唔甩，自己浸到，唔使錢。。。
奶奶問我想點食，我話咖喱炒蟹啊不如，哈哈哈，嚇到奶奶即時話「啊，唔係話，我唔識整啊」
整古下奶奶姐，佢都唔鐘意食咖喱既，我先至再話「講下笑姐，老爺都唔食得辣，蛋蒸蟹啊，個蟹咁生猛，蒸就最清甜羅」
D蟹好多春啊，個個脹卜卜。斬件之后擺碟，然后雞蛋三隻打散加豉油糖生油較好味，淋上螃碟度，上鑊蒸十五分鐘。
好典型既水上人家既食法。。。。
D蛋縮曬蟹既精華，愛黎撈飯最一流。。。。
晨早老爺係漁排撈佐幾條墨魚上黎，生猛果D架，一撈上黎即刻清潔之后剁碎再打成純手工制無添加既最新鮮既墨魚丸。
自己家制墨魚丸，無乜花款，食落啖啖既爽爽既墨魚粒粒，街外絕對食唔到既美味。。。。。
奶奶用韭菜同芽菜一起炒，咁先至食得到最純味既墨魚丸既鮮味
墨魚個身愛黎打佐魚蛋，D須須尾尾，就用牛油蒜蓉黑椒碎去爆香佢。。。
惹味之餘非常之清甜爽口，好正。。。
另外一碟白灼海中蝦。。。。
奶奶蒸佐一碟雞。。。。
本黎有兩條黃腳笠，點知另一條「善」佐，咁唔新鮮唔係游水果隻當然對於有高要求既我地係唔會接受架，所以凈係蒸佐一條斤兩重既黃腳笠，其實細條D魚個肉質總滑，依條魚我專登擺係面前，真係比東星總好味啊我覺得。。。。
我食佐好多。。。。
奶奶煲既老火靚湯--日月魚煲花膠瘦肉湯
夠曬火候，好好味。。。。
好滿足。。。。
我好鐘意返奶奶度食飯，又唔使我煮就有得食，何樂而不為咧。。。。
沒有留言:
張貼留言