原來尋日係大暑，我都唔知，係睇到網友講返先知。。。
無啊，大暑無乜搞作，天氣太熱，足不出戶係最佳避暑方式。
清曬雪櫃D餸頭餸尾，炒碟薯粉食。
材料有：
蔥幾條切段、娃娃菜切絲、甘筍細半切絲、雞蛋一隻煎香切絲、泡菜切絲。
總有一碗仔洋蔥炒肥牛，係之前一晚留定嘅。
做法：
1，先炒軟娃娃菜同甘筍，落鹽較味，然後倒入蛋絲，蔥，泡菜，洋蔥肥牛炒均勻個味。
配料其實好隨意，有乜落乜，不過蔥同泡菜係最好要有，因為佢兩個可以令到個味更突出。
2，配料講完，講主角。
上次有網友提過我，話係國內買嘅薯粉愛黎炒好好，咁我早輪上深圳時，見到下圖果款紅薯粉，就即刻入佐一包返嚟，好平，十幾蚊一大包。
好似煮意粉咁，先用滾水，滾個薯粉五分鐘。
然後撈起浸一浸凍水，滴干水，由得佢慢慢擺係度。
我用佐一包嘅三分一，浸完已經有好大一盤啦。
我係下畫四點鐘浸開個薯粉，然后擺到晚上七點鐘先開始炒。
依隻粉絲真係好掂，擺佐三個鐘，佢都係好有彈性，一D都唔會話變淋或者折斷，不過有少少粘埋一堆咁，不過我落油係鑊度，一炒，佢哋又全部好易就散開。
唔好去街市買果D散裝嘅薯粉，睇落個樣係一樣，但係品質差好遠，浸一浸佢就全部斷曬啦。。。我試買過一次，未炒就全部掉佐，曬料。。。。
如果係香港買唔到依隻薯粉，亦都可以去賣韓國料理嘅舖頭，實有得買韓國粉絲，同佢係有九成相似㗎。。。。
韓國人炒依款粉絲，會配菜炒熟擺埋一邊，然後薯粉用油炒香，再同配菜撈均，再落豉油麻油果D配料。
其實豉油要經熱力加熱之後果種獨特嘅醬香味先至會散出黎，咁樣齋倒入粉去撈，個香味會大大打折，所以我會用油炒香薯粉之后，倒D老抽入去炒，炒粉炒面，落老抽絕對比落生抽要好，因為老抽個味較生抽更淡，但係味道更濃鬱香口，係個樣黑D，但係絕對好味好多。
我鐘意辣辣地，所以落多一匙辣椒醬，再加一匙牛肉粉，一細匙糖調味。
如果食得味好重嘅，可以再加少少鹽，不過我見D配菜已經落過鹽，個味已足夠，所以就無再額外落鹽。
基本嘅味炒均之後，將配菜全部倒入去，用筷子炒均，炒好之後D材料同粉絲係唔會菜一邊，粉絲邊咁㗎，可以全部撈得好均勻。
最最後，落少少麻油同胡椒粉，炒香嘅芝麻粒，去徹底地撈均佢。（因為麻油同胡椒粉都係一經加熱香味就變淡嘅食物，所以一定要最后熄佐火之后再落，咁個香味先至會保持得好D）
就咁多，一款超好味又開胃嘅泡菜炒薯粉就完成啦。。
我影像嘅時候，老公聞到香味已經忍唔住食先，一大碟，我影完相，佢都差不多食完了。。。
老公話喎「個味真係掂過街外果D」
超有成就感~~~
一人一大碟嘅泡菜炒薯粉加埋一大杯雪到極爽嘅啤酒，我哋嘅大暑解暑餐就係咁。。。
沒有留言:
張貼留言