今日晏周起身，真係唔知想食D乜，又唔想換衫落街，即食面又無乜胃口，晚餐預佐燒大量印尼串燒食，所以提早一日已經醃好D肉，咁今日其實可以唔出門口，全情係屋企玩。
咁就問老公，想唔想玩整意粉。
佢應承佐同我整，咁就開工玩「新鮮制意大利蜆殼粉」
新鮮整出黎嘅意粉，同機械整出黎再烘干上市發售果D，係根本唔同Level嘅一樣嘢。
今日整嘅蜆殼粉，我炒黎食~~~
大家排排座，跟我一起學，點樣係屋企，用一雙手，自己整到新鮮嘅意粉出黎啦。。。。
先俾個整後好嘅成品大家睇下，如果有興趣，繼續往下睇。。。
其實意大利好多面食，都係好早之前，由意大利旅行家
Marco Polo ，從中國帶返到意大利，再改頭換面，改變為適合本國人進食的各式面食。
譬如中國嘅大包，由於意大利人唔識得如果將餡收返入面團入邊，於是將佢攤開佐係發酵之後嘅面團表面，加以自己喜歡嘅芝士肉類等做為餡料，唔識得蒸，咁就焗熟佢，長久之後，就成為佐今日名聞天下嘅意大利薄餅。
中國當年各式各樣嘅面食，就成為佐意大利今時今日嘅好多品種嘅面類。
先講下基礎嘅意大利面嘅原料。
真係超級簡單：
100g 嘅低筋面粉，就配一隻蛋，再俾多少少鹽落去增加風味。
係咁多。
係依個基礎面團之上，如果整成條狀，咁就係最普通嘅意大利粉啦。
今日我用佐200g低粉，咁就打佐二隻蛋落去。
然后就好似平日攪面團咁，先將佢攪到一攤，然後再搓成面團。
蓋一張少少濕嘅布係面團上，擺入雪櫃半個鐘，等佢醒面。
醒好嘅面團，取一部份出黎，壓成一塊，再切條。
然后切粒粒。
補充下，搓面片再切成粒粒嘅時候，唔好整得太厚同埋太大粒，最好係搓薄D，切得細粒D，我嘅每一粒都只不過我尾指咁大粒咋，而且搓得好薄，咁食起上黎口感先至夠正。。。
切好嘅粒粒用少少低粉佐手粉，撲係粒粒上邊，等佢地干爽分明，唔會痴埋一舊。
然後搵一個整壽司果種簾仔，將切好嘅粒粒擺上去，用大拇指，向前一推，咁就搓好一個蜆殼粉啦。。。
其實依種粉，係中國北方係真實存在㗎，北方人叫佢「向前滾」（因為操作嘅動作係向前一推），又或者「貓耳朵」（如果就咁係平嘅針板上邊向前一推，咁個形狀就似貓仔嘅耳朵，因此又得咁樣一個名），出處好多，我唔真實故仔係邊隻較為正確，所以就唔多講啦。
中國北方嘅媽媽，通常會係屋企小朋友第一次返學之前，整返咁樣一碗「向前滾」俾佢食佐先至返學，意喻係叫小朋友自此之後，就要好好地，一路向前行。好有意頭。。。。
第時我有佐小朋友，佢第一日返學，我又整咁樣一碗面俾佢。
我肯定會係一個好媽咪㗎。。。
睇下，整出嚟嘅形狀，係未好似一個蜆殼咧~~~
今日禮拜日，又熱，費事出街熱餐飽，咁我地兩公婆，就得閒係屋企玩下整面仔，幾開心。。。。
我搓面切粒粒，老公就搓成一個個嘅蜆殼仔。。。
兩個人夾手夾腳，好快手就整好一大碟啦。。。
然后老公收拾戰后殘局，清理好現場環境，而我就開鑊煮面仔。
因為最終係要炒佢黎食，所以唔要煮得太熟，我煮至八成熟就撈起，再過一過凍水。（點知八成？試食羅，憑感覺㗎）
一開始醒面嘅時候，我就準備定炒面嘅材料。
因為天氣熱熱地，屋企凈有一個蕃茄，少少洋蔥，尋日買佐幾條青瓜，總有豬肉，咁就將佢地全部切成粒粒一起伴炒啦。
豬肉就用「豉油糖生粉孜然粉」醃好味。
因為我打算炒一個中國西北比較常見嘅食法，孜然炒面。
老公係孜然狂迷，咁樣炒，佢實歡喜到閉。
炒法，先將豬肉同洋蔥炒至八成熟撈起，然后倒蕃茄同青瓜一起炒至出味，再將過佐凍水嘅蜆殼粉倒入去，開大火，加一匙油，再炒炒炒，然后倒入肉絲，最后衝刺炒兩炒，落豉油鹽較味。
熄火之前落孜然粉辣椒粉兜兩兜，正~~~
蕃茄酸味味，青瓜香噴噴，蜆殼粉爽滑滑，豬肉嫩次次，咁樣一碟孜然炒蜆殼粉，無得頂~~~
老公開心到食到停唔到口。。。。
皆因其中都有佢嘅功勞係度嘛。。。。
不過真係幾考耐性㗎。。。。。整依款粉。。。。
沒有留言:
張貼留言