依排天氣又濕又焗。無話煮，煮好之后都無乜胃口食。
所以依日中午就煲定一大煲粥，咁晏同夜晚食依煲粥，再炒多兩味小菜，又輕鬆又易開胃。
煲白果腐竹瑤柱粥。
睇過一本介紹飲食養生既書話，依款粥水對於男士調理身體有極好作用，對於女士更有分健脾益腎的功效，如果依排尿比較多，咁每日早上整依款粥水當早餐飲一碗連續食一個星期，有好明顯既改善作用。
對於功效我就無乜所謂，不過我好鐘意依款粥既味道。
準備佐白米一杯半，扁竹一塊，瑤柱三粒，白果二十幾粒。
係咁多材料。。。
白果係買新鮮白果，平日只需要放係室外通風處就得啦，唔使特別處理，可以擺得好耐。
食之前，用焗爐焗到佢表面變深色之后，用個蒜夾好容易就將白果肉取出。而且經過加熱烘熟的步驟，可以減少白果本身既毒性。
用快速煲煲佐十五分鐘再熄火焗多十五分鐘。。。
一大煲靚靚既粥就煲好啦。。。。
好簡單。。。。
依煲粥可以食兩餐架，咁大一煲。。。
煲粥我喜歡落多一湯匙糯米入去，咁啖粥食起上黎會更滑D。。。
另外，友人送佐幾包酸筍，老公食筍會過敏，咁唯有我自己一個人享用了。
酸筍愛黎送粥酸咪咪真係好鬼開胃。
用免治豬肉同酸筍炒埋一碟，簡單地落糖落豉油調味已經足夠。
其實酸筍好易整，只要將新鮮筍切成一舊舊之后，用乾淨既礦泉水浸住佢，等筍自己同水產生化學作用，就會發生發酵作用進而變酸，不過發酵過程產生既酸味未必人人可以接受，就好似榴蓮，愛之深也，憎之避不及。。。。。
又係好個人既一種食物，強求不得。。。。。
我就愛到閉。。。。
炎炎夏日，一碗清粥，一碟酸酸小菜，感覺真係幸福得無邊無際。。。。
另外炒佐一款小菜俾老公送粥。
梅菜，屋企通常會有兩款係度。
左邊果款係普通街市可以見到，通常十三四蚊有交易，味道濃郁口感粗糙，通常我會愛黎加入燜炒之類用。
右邊果款未必處處可以搵到，係旺角街市得一檔有售，近三十蚊一斤。比普通果隻貴一倍。不過貴得有理，佢有一種醃制物之外既清香，食落口感爽滑唔起渣，最適合愛黎整肉餅。
晏周果餐我就用梅菜同青瓜炒埋一碟。
用普通果隻梅菜，貪佢味道夠濃郁，可以令到素菜更加惹味D。
材料：青瓜兩條，梅菜適量，蒜蓉適量。
調味：蠔油
作法：先用油爆香蒜蓉同梅菜，倒入蠔油調味，如果覺得唔夠咸可以再加少少豉油同糖，然后倒入青瓜同炒，落少少水燜一燜，搞掂。。。。
因為青瓜愛黎炒，所以要切得略厚少少，咁炒完食起上黎入味之餘都總有爽脆既口感。
梅菜同蠔油既惹味配以青瓜既清香，同我想像中既味道一樣咁搭咁出色，係一款好清爽好適合夏季食用既小菜。。。。
晏周清粥加小菜。。。。。
因為兩個小菜都食唔完，夜晚果餐只需要再加蒸多一個梅菜蒸肉餅就搞掂。。。
咁熱既天時，食粥真係好好既選擇。。。。。
沒有留言:
張貼留言