一餸兩味食---蕃茄牛肉薯仔湯、柱候牛肉薯仔

好似好耐無乜點食過菜，所以買佐一條脆肉瓜黎炒。

脆肉瓜一條二蚊。加少少煙薰味嘅臘肉落去，少少干蔥做調味。

 

脆肉瓜真係又清甜又好味。。。。

 

想飲啖湯，咁就買佐兩隻蕃茄六蚊，一個薯仔三蚊，用佐半條牛腱當十蚊。就咁睇，蕃茄又真係幾鬼貴啵，拍得住牛肉啦。。。

計埋啖湯19蚊。

 

好簡單咋，牛肉切片後，先用生粉同埋少少豉油糖醃一醃，然後將薯仔切塊，蕃茄剁碎，最後將所有材料掉入個煲仔度，落一細細塊仔薑，加水，開火滾二十幾半個鐘到就得啦。。。。

 

因為渣料勁多，所以雖然啖湯凈係滾佐二十幾分鐘，不過真係超濃啊。而且聞落有好濃郁嘅牛肉味添。。。。

睇下啖湯，係未好濃郁咧。。。

將D薯仔同牛肉撈起後用，啖湯都總有大煲㗎。。。

精華嚟㗎啦。。

 

咁D湯渣點咧？

食得無曬嘛。。。

咁我就用少少薑同蒜蓉同埋洋蔥，加柱候醬去爆香佢。。。

又係餸一味啦~~

 

因為煲過湯嘅牛肉同薯仔都已經好腍，所以加醬料去炒佢係令佢更惹味，就無需額外要加水去燜佢啦。

作法就係用油爆香料頭（薑蒜洋蔥）之后，將薯仔同牛肉放落鑊度，加二湯匙柱候醬，然后落少少水，炒均個味就搞掂`~

又惹味，又易入口，而且牛腱嘅味道好濃郁，煲過湯再加醬去炒，依然都係咁好味㗎。。。

 

而啖湯，酸咪咪，濃郁郁，香噴噴~~~

 

二餸一湯，計埋，都係21蚊咋~~

 

 

今日惠康車里子特價，15.9/磅咋...買佐磅幾,都係20蚊咋...

屋企包米就黎食晒,剛好今日睇到惠康金象做特價,77.9/包,俾電話老公,返黎之前係樓下惠康搬包上黎......